БАНКАТА ВО КОЈА ЧУВА ПАРИ И ОСНОВАЧОТ НА ФЕЈСБУК ЈА СПАСУВААТ АМЕРИКАНЦИТЕ: Акциите на банката која опслужува побогати клиенти паднаа за 70 отсто
Откако две банки во Америка прогласија банкрот , најголемата група американски банки реши да ги преземе неопходните чекори за спас на приватната банка First Republic, која се најде во слична ситуација.
Според американските медиуми, Bank of America, Goldman Sachs, JP Morgan, Citigroup и Wells Fargo ќе депонираат 30 милијарди долари во банката од Сан Франциско, која се најде во слична ситуација како Силиконската долина и Signature банката.
– Постапките на најголемите американски банки ја одразуваат нивната доверба во банкарскиот систем на земјата. Заедно, нашата финансиска сила и ликвидност ја дистрибуираме во поширокиот систем, онаму каде што е најпотребно – стои во заедничкото соопштение на банките.
Големите банки и регулатори во Соединетите држави се надеваат дека овие акции ќе дејствуваат како заштитен ѕид со заштита на First Republic Bank и другите помали банки.
– Акциите на банката со седиште во Сан Франциско, која главно опслужува побогати клиенти, вклучувајќи го и основачот на Фејсбук, Марк Цукерберг , паднаа за околу 70 отсто по веста за колапсот на банката во Силиконската долина – пишува Гардијан.
По повод спасувањето на оваа американска банка се огласија и министерката за финансии на САД Џенет Јелен и претседателот на ФЕД Џеј Пауел.
– Оваа изјава за поддршка од група големи банки е многу добредојдена и ја покажува издржливоста на банкарскиот систем. Можам да ги уверам членовите на финансискиот комитет на Конгресот на САД дека нашиот банкарски систем е здрав и дека Американците можат да бидат сигурни дека нивните депозити ќе бидат таму кога ќе им бидат потребни – рече Јелен.
Според деталите од планот, четири банки, меѓу кои Bank of America, Citigroup, JP Morgan и Wells Fargo ќе депонираат пет милијарди долари во First Republic. Голдман Сакс и Морган Стенли ќе депонираат 2,5 милијарди долари, а BNY Mellon, PNC Bank, State Street, Truist и US Bank ќе депонираат 1 милијарда долари.
Многу помали банки во САД, вклучително и First Republic Bank, имаат големи количини на неосигурани депозити над лимитот од 250.000 американски долари. Ова доведе многу клиенти да ја напуштат банката и да ги остават своите пари на друго место. Ова создаде проблем за банката, која мораше да позајмува пари или да продава средства за да им ги исплати на клиентите нивните готовински депозити.
– За да заработат, банките дел од депозитите на своите клиенти користат за давање кредити на други клиенти. Сепак, Првата република има невообичаено висок коефициент на долг и депозит од 111 проценти. Тоа значи дека банката позајмила повеќе пари отколку што има во депозити од клиенти, што ја прави особено ризична за инвеститорите – пишува CNN.
