Пентагон: Кинески шпионски балон лета над САД
Беа мобилизирани борбени авиони, но воените лидери го советуваа претседателот Џо Бајден да не го урива балонот, стравувајќи дека остатоците може да претставуваат закана за безбедноста.
Кинески шпионски балон лета над Соединетите Држави веќе неколку дена, изјавија американски официјални лица, што би било дрзок чин само неколку дена пред планираното патување на американскиот државен секретар Антони Блинкен во Пекинг.
Беа мобилизирани борбени авиони, но воените лидери го советуваа претседателот Џо Бајден да не го урива балонот, стравувајќи дека остатоците може да претставуваат закана за безбедноста.
Бајден го прифати советот, изјавија американски официјални лица, пренесува Ројтерс.
Соединетите Американски Држави го „чуваа“ балонот кога тој влезе во американскиот воздушен простор и го гледаа од воен авион, изјави за новинарите официјален претставник кој сакаше да остане анонимен.
Кина е „најголемиот геополитички предизвик“ на САД
Канадското Министерство за одбрана соопшти дека е откриен „балон за надгледување на голема надморска височина“ и дека го следи „потенцијален втор инцидент“, без да даде повеќе детали, но додаде дека тие биле во чест контакт со САД.
Веста првично беше објавена додека директорот на американската Централна разузнавачка агенција (ЦИА) Вилијам Барнс зборуваше на настан на Универзитетот Џорџтаун во Вашингтон, каде што ја нарече Кина „најголемиот геополитички предизвик“ со кој се соочуваат САД во моментов.
„Владата откри и следи надгледувачки балон на голема височина во моментов над континенталниот дел на Соединетите Држави“, изјави за новинарите портпаролот на Пентагон, генерал Патрик Рајдер.
„Балонот моментално патува на височина далеку над комерцијалниот воздушен сообраќај и не претставува никаква воена или физичка закана за луѓето на земјата“.
Кинеското Министерство за надворешни работи не одговори веднаш на барањето на Ројтерс за коментар.
Американските власти го покренаа ова прашање со нивните кинески колеги.
Им укажавме на сериозноста што оваа проблематика ја има за нас“, рече еден функционер.
Еден американски функционер рече дека балонот се проценува дека има „ограничена додадена вредност од перспектива на собирање разузнавачки информации“.
Балонот е алармантен, но не и изненадувачки
Блинкен се очекува да отпатува во Кина следната недела, во посета договорена во ноември од Бајден и кинескиот претседател Кси Џинпинг.
Не е јасно како откривањето на шпионскиот балон може да влијае на тие планови.
Американскиот сенатор Марко Рубио, првиот републиканец во Комитетот за разузнавање на Сенатот, рече дека присуството на шпионскиот балон е алармантно, но не и изненадувачки.
„Нивото на шпионажа насочено кон нашата земја од Пекинг драстично се зголеми по интензитет и дрскост во последните пет години“, напиша тој на Твитер.
Републиканскиот сенатор Том Котон го повика Блинкен да го откаже патувањето во Пекинг.
Односите меѓу Кина и САД се влошија во последниве години, особено по посетата на тогашниот претседател на Претставничкиот дом Ненси Пелоси на Тајван минатиот август, што предизвика драматични кинески воени вежби во близина на островот.
Оттогаш, Вашингтон и Пекинг се обидуваат почесто да комуницираат и да спречат влошување на врските.
Над силосот на балистичка ракета во Монтана
Американските воени лидери размислуваа да го соборат балонот над Монтана во средата, но на крајот го советуваа Бајден да не го стори тоа поради безбедносниот ризик од урнатините, изјави претставникот за новинарите.
Аеродромот во Билингс, Монтана, ги приземји летовите додека војската ги мобилизираше силите, вклучително и борбените авиони Ф-22, во случај Бајден да нареди соборување на балонот.
Жителот на Билингс, Чејс Доак, кој го фотографираше балонот на 1 февруари, рече дека на почетокот мислел дека е ѕвезда.
„Но, мислев дека е малку лудо бидејќи беше средината на денот и кога го погледнав, едноставно беше преголемо за да бидам ѕвезда“, изјави тој за Ројтерс.
Официјалното лице рече дека сегашната патека на летот ќе го однесе балонот над голем број чувствителни места, но не даде детали.
Во воздухопловната база Малмстром во Монтана има 150 силоси за интерконтинентални балистички ракети.
Друг американски функционер рече дека шпионскиот балон бил следен во близина на Алеутските острови и Канада пред да влезе во САД.
Таквите балони обично летаат на височина од 24.000 до 37.000 метри, многу над местото каде што лета комерцијалниот воздушен сообраќај.
Ефтин метод за собирање податоци
Борбените авиони со најдобри перформанси обично не летаат над 20.000 метри, иако шпионските авиони како што е U-2 имаат официјален праг од 24.300 метри или повеќе.
Крег Синглтон, експерт за Кина во Фондацијата за одбрана на демократиите, рече дека таквите балони биле широко користени од САД и поранешниот Советски Сојуз за време на Студената војна и биле евтин метод за собирање разузнавачки информации.
Шпионски балони летаа над САД неколку пати во последниве години, но се чини дека овој се задржува подолго отколку во претходните случаи, рече еден американски официјален претставник.
