Преживеаната Алејна Олмез сведочи: Се борев, не сакав да се откажам

„Не очекувавме дека тоа ќе се случи, но кога Алејна излезе, тоа беше чудо за нас. Доживеавме и радост и тага во исто време“, истакна нејзината тетка Думан

Седумнаесетгодишната Алејна Олмез која беше спасена од под урнатините по поминати 248 часа по разорните земјотреси што ги погодија јужна Туркије и Сирија сведочи за нејзината борба за живот. Таа беше спасена од под урнатините во населбата Кајабаси во Кахраманмараш.

„Се борев, не сакав да се откажам. Сите ми даваа голема поддршка и ми помагаа. Ви благодарам многу за сѐ“, нагласи Алејна.

Нејзината тетка Ѓулер Думан рече дека е среќна што Алејна била спасена од под урнатините.

„Не очекувавме дека тоа ќе се случи, но кога Алејна излезе, тоа беше чудо за нас. Доживеавме и радост и тага во исто време“, истакна Думан, која им се заблагодари на сите, особено на лекарите кои се грижеа за Алејна.

Откако Алејна беше извлечена од урнатините, д-р Џенгиз Дилбер рече дека е неверојатно што таа е во толку добра здравствена состојба со оглед на тоа што била под урнатините 248 часа.

„Бевме изненадени што нејзините телесни функции се добри и што функцијата на бубрезите не ѝ беше влошена. Тоа е неверојатна работа. Нејзиното здравје е многу добро. Се разбира, има и трауми“, изјави тогаш Дилбер.

Посета од претседателот и првата дама на Туркије

Олмез моментално се наоѓа на лекување во болница во Анкара, а вчера беше посетена од турскиот претседател Реџеп Таип Ердоган и неговата сопруга Емине.

Таа е среќна поради посетата на претседателот и првата дама на Туркије.

„Нашиот претседател дојде во посета, се чувствував добро, се чувствувам горда. Убаво е чувството да се има толкава поддршка“, рече Олмез.

ТРТ БАЛКАН