Најголемата бугарска фабрика за оружје ги испраќа вработените на принуден одмор
Арсенал, најголемата фабрика за оружје во Бугарија, одлучи да ги испрати вработените на принуден одмор поради прекумерното поскапување на струјата и епидемијата со коронавирус, пишува Анадолија.
Николај Ибушев, генерален директор на компанијата, која е најголемиот работодавец во јавниот сектор во Бугарија, објави за Бугарското национално радио (БНР) дека повеќе од 8.000 вработени ќе бидат на одмор од 17-ти јануари до 11-ти февруари, оваа година.
Ибушев изјави дека одлуката за привремено затворање е последица на константните поскапувања на суровините и енергенсите, како и брзото ширење на омикрон сојот од коронавирусот. Исто така, кажал дека се зборувало за нов, четиридневен работен распоред во компанијата, но тоа не било прифатено, а причината била, непродуктивна алтернатива за вработените.
Компанијата Арсенал, која е основана во градот Русе во 1891 година, за време на Османлиско-руската војна, во 1924 година била преместена во Казанлак, централна Бугарија.
