Вие имате прво да ја знаете вистината

И Швајцарија пред укинувањето на ковид сертификатите, Министерот за здравство: „Завршува времето на нивното користење“

Швајцарскиот министер за здравство, Ален Берсет, навести дека контроверзните потврди за ковид во неговата држава наскоро би можеле да бидат укинати бидејќи одговорот на јавниот здравствен систем на пандемијата на коронавирус се чини дека е „на вистинскиот пат“.

Документот, кој, како и во поголемиот дел од остатокот од Европа, покажува дали некое лице е вакцинирано, било заразено или има негативен тест за коронавирус, беше воведен во Швајцарија во јули минатата година, а поседувањето е услов за влез на голем број јавни места и настани.. Но, Берсет во саботата рече дека можеби е дојдено време да се стави надвор од употреба целиот систем за ковид сертификати, за кој Швајцарците гласаа на референдум.

– Се чини дека времето на употреба на Ковид сертификатите е при крај, изјави тој за весникот Schweiz am Wochenende, цитиран од РТ.

Тој додаде дека му се чини дека државата е „на вистинскиот пат“, но предупреди и дека „вирусот во неколку наврати се покажал како непредвидлив“.

Минатата година во неколку швајцарски градови се одржаа протести поради воведувањето на сертификати и други ограничувања за коронавирусот, а откако противниците на заклучувањето собраа речиси 200.000 потписи, во декември се одржа референдум на кој повеќето граѓани ги поддржаа ограничувањата за епидемијата, вклучително и сертификатите.

Од 20 декември, системот за сертификација е зајакнат, така што само оние кои се вакцинирале или се разболеле можат да влезат во ресторани, културни и спортски настани и други јавни настани во затворен простор. Исто така, приватните собири се ограничени на максимум 10 лица доколку има барем само едно лице на возраст над 16 години кое ниту прележало Ковид, ниту било вакцинирано.

Минатата среда, владата објави дека ќе ги продолжи правилата за самоизолација и задолжителна работа од дома до крајот на февруари, исто така ги истакна плановите за одржување на други ограничувања до март, бидејќи Швајцарија во моментов се соочува со петти епидемиски бран.

Иако во петокот беа пријавени скоро 38.000 нови случаи, министерот Берсет во саботата рече дека владата сепак може да ја промени одлуката за задолжителна работа од дома во препорака и дека може целосно да ја укине обврската за самоизолација доколку ситуацијата се подобри во наредниот период.

Зачленете се и ќе добивате екслузивни вести од нашиот портал!