Полициски службеници од Одделот за криминалистичка полиција – Сектор за недозволена трговија со дрога, оружје и опасни материи – Единица за недозволена трговија со дрога, во координација со претставници од Комисијата за оценување на исполнетост на условите по однос на простор, опрема и кадар за одгледување на канабис за медицински цели и во содејство со полициски службеници од ОВР Гостивар, вчера извршиле вонредна контрола и претрес врз основа на наредба издадена од Основен суд Гостивар во правно лице во гостиварското село Врапчиште, кое поседува одобрение за одгледување на канабис за медицински цели.
Од извршената вонредна контрола и претресот, информираа денеска од МВР, биле констатирани голем неправилности, односно дека во правното лице не се исполнети барањата за обезбедување и надзор, а оградата и бриновиот елемент биле оштетени. Покрај ова, објектот, појаснуваат од МВР, е без електрична енергија, а од проверките во Агенцијата за вработување евидентирани се само две вработени лица, кои не биле затекнати на местото, наспроти двете затекнати лица, албански државјани, кои не биле вработени во правното лице, од кои едното има забрана за влез во државата и при доаѓање во објектот тоа се дава во бегство, но набргу било пронајдено и приведено.
„Во магацинот за готов производ, т.н. СЕФ-соба биле пронајдени 327,3 килограми сув цвет спакуван во алуминиумски вреќи, што е спротивно на член 29-Ѓ од Закон за контрола на опојна дрога и психотропни супстанции, а според официјалното Известување доставено до Министерство за здравство, дополнително бил констатиран вишок од 23,3 килограми сув цвет од канабис. Исто така, затекнати биле 2.746 растенија од канабис кои се одгледуваат во надворешниот простор на правното лице, спротивно на предвидените услови. Сите пронајдени стебла од канабис и сув цвет од канабис по насоки на Јавен обвинител при ОЈО Гостивар, во текот на денешниот ден (12.08.2023) се одземени, а по комплетирање на целокупната документација од страна на ОВР Гостивар до ОЈО Гостивар против правното лице и против одговорното лице ќе биде поднесена соодветна кривична пријава согласно Законот за контрола на опојни дроги. Исто така, од страна на Комисијата ќе биде поднесен предлог за одземање на одобрението за одгледување канабис за медицински цели“, соопштија од МВР.
Истиот ден извршена била и редовна контрола во уште едно правно лице во гостиварско Врапчиште, кое поседува одобрение за одгледување на канабис за медицински цели. Од извршената контрола биле констатирани неправилности во однос на обезбедување на објектот и во делот на вработени лица, поради што од страна на Комисијата ќе биде поднесен предлог за одземање на Одобрението за одгледување канабис за медицински цели.
Претходниот ден, се наведува во соопштението, од страна на полициските службеници од Одделот за криминалистичка полиција во координација со претставници на Комисијата за оценување на исполнетост на условите беше извршена уште една редовна контрола, овој пат во правно лице од Скопје, кое поседува одобрение за одгледување на канабис за медицински цели, при што, исто така, биле констатирани неправилности во делот на обезбедувањето на просторот и вработените и ќе биде поднесен предлог за одземање на одобрението.