Во Македонија во моментов има над 200 пациенти кои чекаат трансплантација на орган. Оваа листа е динамична и постојано се менува, истакна проф. д-р Билјана Кузмановска, национален координатор за трансплантација, на денешната прес-конференција во Министерството за здравство.
Со оваа последна, успешна кадаверична трансплантација каде што за многу краток рок беа пуштени дома сите пациенти – и двата пациента кои примија бубрег и пациентот кој доби црн дроб, складирани се во коскената банка коски и лигаменти, ткива, додаваме уште една бројка во статистиката на трансплантацијата. Но, целта на денешната прес-конференција е не само да информираме дека статистиката на трансплантација во Македонија се зголемува, туку да истакнеме за значењето на органдонорството и значењето на трансплантацијата. Зад секоја статистика стојат животи, стојат приказни за надеж, стојат приказни за болка, за жал понекогаш и приказни за лична загуба, истакна Кузмановска.
Надлежните на денешната прес-конференција информираа за две сложени интервенции извршени на Клиниката за дигестивна хирургија во Скопје.
Директорот на Клиниката за дигестивна хирургија, Огнен Костовски рече дека на 12 и 13 март биле извршeни кадавeрични трансплантации на црн дроб, два бубрега.
Нешто подоцна, фондовски поддржана, извршена била прва баријатрична процедура на пациент. Два дена траела вкупната хоспитализација.
Ова е петта кадаверична трансплантација на црн дроб со најуспешен тек, подвлече Костовски.
Тој рече дека трендот продолжува и оти во иднина ќе се прават сите подготовки за почнување трансплантациски процес од жив дарител.
Задоволство од денешниот настан изрази и министерот за здравство Арбен Таравари.
Во оваа прилика, како највисок чин на хуманост, би сакал да се заблагодарам на семејствата, кои во најтешките моменти на загуба, покажуваат големина и хуманизам, благодарение на што се спасуваат човечки животи или се подобрува квалитетот на живот на пациентите, рече министерот.
Тој им се заблагодари и на сите здравствени работници.
Во оваа прилика би сакал да истакнам дека сме посебно фокусирани на едукација и надградба на знаењата, а планирани се и новини во областа на трансплантацијата, најави министерот.