УНРВА (Агенција на ОН за палестински бегалци) објави дека околу 4.000 камиони со хуманитарна помош се подготвени да влезат во Појасот Газа, од кои половина превезуваат храна и брашно. На некои видеа може да се види дека тие веќе почнале да навлегуваат во палестинската енклава.
– Нападите на хуманитарните конвои во Појасот Газа би можеле да се намалат бидејќи хуманитарната помош почнува да пристигнува по прекинот на огнот – изјави Филипе Лазарини, претставник на УНРВА.
Меѓународните хуманитарни организации постојано го обвинуваат Израел за блокирање на дистрибуцијата на храна, лекови и гориво за време на војната во
Газа.
Како дел од договорот, хуманитарната помош во областа треба да се зголеми на 600 камиони дневно, што е над минимумот од 500 камиони дневно, за кои хуманитарните агенции велат дека се потребни за да се олесни масовната хуманитарна криза во Газа.
На крајот на октомври, израелскиот парламент усвои закон со кој се забранува УНРВА да работи во земјата. УНРВА тогаш предупреди дека законот ќе предизвика „распад“ на синџирот за помош за Газа.
Илјадници Палестинци раселени поради војната денеска се вратија во своите домови во Појасот Газа откако стапи на сила примирјето меѓу Израел и Хамас, објавија новинарите на Франс прес.
Во средината на денот илјадници луѓе пристигнаа во Џабалија од градот Газа на северот на палестинската територија. Други движења на населението беа забележани во секторите Рафа и Кан Јунис на југ, според очевидци.
Некои во пикапи, некои пеш, некои со насмевки го покажаа знакот V, знакот на победата, додека други делеа слатки или вееја палестински знамиња.
Тие со големо славење го дочекаа почетокот на историското примирје во Газа, иако денеска Израел изврши неколку напади во кои според агенцијата Хамас
најмалку 10 лица загинаа, а 25 се ранети.
Кабинетот на израелскиот премиер соопшти дека ослободувањето на трите Израелки кои ги држи Хамас во Газа ќе биде извршено по 15 часот денеска, по наше време. Во соопштението се наведува и дека за седум дена ќе бидат ослободени уште четири Израелки.
Оваа информација за ослободување на заложниците доаѓа откако конечно почна долгоочекуваниот прекин на огнот во Газа, по речиси три часа одложување. Прекинот на огнот беше одложен бидејќи Хамас не ги наведе имињата на трите Израелки што планира да ги ослободи подоцна во текот на денот.
Првата фаза од прекинот на огнот, која трае 42 дена, треба да резултира со враќање на вкупно 33 заложници од Газа и ослободување на стотици палестински затвореници.
Израелските сили треба да се повлечат во тампон зоната во Газа, а многу раселени Палестинци треба да се вратат во своите домови.
Катар, кој беше клучен посредник во преговорите за прекин на огнот, потврди дека прекинот на огнот во Газа започна. Катар, САД и Египет ќе го надгледуваат договорот за прекин на огнот преку тело со седиште во Каиро.
Војната во Газа започна со упадот на Хамас на југот на Израел на 7 октомври 2023 година, кога беа убиени околу 1.200 луѓе, а 251 заложник беа земени.
Од тој број, 94 сè уште се во Газа, а израелската војска верува дека 34 од нив се мртви.
Најмалку 46.899 луѓе загинаа во израелската офанзива , според податоците на Министерството за здравство на Хамас, податоци кои ОН ги сметаат за веродостојни.
Според Ројтерс, нешто повеќе од 400 израелски војници загинале во борбите во Појасот Газа.