Белата куќа денес објави дека состојбата на вените на американскиот претседател Доналд Трамп е нормална, откако лекар го прегледал за оток во долниот дел од нозете.
Тие посочија дека ултразвукот на нозете на Трамп открил дека тој имал хронична инсуфициенција – честа состојба, особено кај луѓе над 70 години. Тие тврдат дека нема докази за посериозни состојби, како што се тромбоза или артериска болест. Понатаму, дополнителните прегледи покажаа дека нема знаци на срцева слабост, оштетување на бубрезите или системска болест.
Белата куќа уверува дека Трамп не се чувствува непријатно поради споменатата ситуација. Венската инсуфициенција е состојба во која вените имаат проблеми со испраќањето крв од нозете назад кон срцето. Може да се влоши со текот на времето, но може да се контролира ако третманот се започне во рана фаза.
Исто така, беше потврдено дека Трамп имал модринки на задната страна од рацете. Како причина за ова беше наведена мала иритација на меките ткива поради честото ракување и употреба на аспирин, кој се зема за спречување на кардиоваскуларни заболувања, објави Ројтерс.