Кога станува збор за антиинфламаторна диета, многу луѓе ќе помислат на разни зеленчуци, овошја или зачини – но постои една група намирници што експертите особено ја истакнуваат како клучна во борбата против хроничното воспаление. Иако не секогаш се прв избор, сè повеќе нутриционисти препорачуваат нивно вклучување во исхраната поради нивните хранливи материи кои помагаат во заштитата на телото од сериозни болести како што се срцеви заболувања, дијабетес тип 2, Алцхајмерова болест и рак.
„Вклучувањето на повеќе од овие намирници во вашата исхрана може да го поддржи целокупното здравје и да го намали ризикот од болести поврзани со воспаление“, вели нутриционистката Лорен Манакер за EatingWell.
Станува збор за масни риби, како што се лосос, скуша, сардини, харинга и инчуни. Овие видови се богати со омега-3 масни киселини, особено EPA и DHA, кои го намалуваат производството на воспалителни молекули и помагаат во борбата против хроничното воспаление. Манакер објаснува: „Овие есенцијални масни киселини играат клучна улога во намалувањето на воспалението во телото“
Освен што помага во борбата против воспалението, масната риба е исто така одличен извор на протеини кои го поддржуваат растот на мускулите и имунитетот.
Според диететичарката и нутриционистка Трејси Локвуд Бекерман, јадењето масна риба може да помогне во заштитата на органите од внатрешни и надворешни закани, а диететичарката Меди Паскариело додава дека таа придонесува и за здравјето на срцето, мозокот и кожата.
Освен што помага во борбата против воспалението, масната риба е исто така одличен извор на протеини кои го поддржуваат растот на мускулите и имунитетот, а содржи и важни микронутриенти. Манакер истакнува дека содржи витамин Д, клучен за здравјето на коските и поддршката на имунитетот, и селен, антиоксиданс кој ги штити клетките од оштетување. Затоа, се препорачува да се вклучат околу две порции масна риба неделно.
Може лесно да се вклучи во исхраната – без разлика дали се користи свежо или конзервирано. Сардините и инчуните може да се додаваат во салати, намази или да се јадат како закуски, додека лососот и туната се лесни за подготовка.
„Започнете со нивно вклучување во јадења што веќе ги сакате – на пример, лосос во салата, скуша со крекери од цело зрно или туна во тортиља“, заклучува Манакер.