Дрес-кодот повторно е актуелен во познатиот милански театар „Скала“ , иако никогаш официјално не бил укинат , но не се применувал ниту во изминатите години, објавија денес италијанските медиуми.
Како што објави агенцијата Анса, не станува збор за драконски правила како што се задолжителна вратоврска или вечерна тоалета, туку за низа минимални индикации кои веќе се означени на влезот, како и на билетарницата, а се однесуваат на фактот дека не е дозволено влегување во маичка, шорцеви или апостолки.
Вработените во театарот се одговорни за почитување на овие правила, а постои и предупредување дека на оние кои нема да влезат во театарот нема да им бидат вратени парите за билетот.
Забраната за носење маица без прерамки не значи, на пример, дека дамите не можат да влезат ако носат блузи или фустани без ракави.
„ Управата ја поканува публиката да избере облека што е соодветна и ги почитува и театарот и другите гледачи “, се наведува на веб-страницата на миланската Скала.
Директорот на театарот во заминување, Доминик Мејер, беше тој што воведе толеранција во однос на облекувањето, бидејќи во младоста, како што постојано раскажуваше, бил карано од соседите во ложата на Париската опера, кои го прекорувале дека изгледа како „работничка класа“, објави Анса.
„Ми е гајле што младите луѓе доаѓаат во Скала, а не гледам како се облечени“, рече тој.
Според агенцијата, друга забрана се однесува на храна и пијалоци што не смеат да се внесуваат во театарот.
Во исто време, чести беа апели да не се снимаат видеа или фотографии со мобилни телефони за време на претставите во Скала, каде што дури беа принудени да ги замолат посетителите да не се наведнуваат преку оградата на ложите и галериите со своите мобилни телефони, откако еден уред падна од гледачот и удри во друг на приземјето, се присети Анса.