Украинскиот претседател Володимир Зеленски изјави дека украинското разузнавање има информации што укажуваат дека Русија подготвува нови офанзивни операции.
„Денес одржав состанок со Генералштабот. Имаше разузнавачки извештаи – многу детални. Разговаравме за општата ситуација: војната, целите на Русија, капацитетите на руските трупи и нејзиниот воено-индустриски комплекс, како и нашата способност да извршиме притисок врз Русија и да ги попречиме нејзините планови“, рече Зеленски, според Телеграф.
„Од информациите добиени од разузнавачките служби и од податоците од отворени извори, можеме да видиме дека Путин и неговиот круг не планираат да ја завршат војната. Во моментов, нема индикации дека сериозно размислуваат за мир или дипломатија. Напротив, постојат доволно докази дека се подготвуваат за нови офанзивни операции“, рече меѓу другото украинскиот претседател.
Тој исто така нагласи дека Русија се надева дека оваа војна ќе продолжи и дека ова, од нејзина страна, е „отворено непочитување на сите оние низ целиот свет кои бараат мир и се обидуваат да работат дипломатски“.
Зеленски е сигурен дека разузнавачките служби на украинските партнери исто така ги имаат овие информации, се свесни за овие факти и од суштинско значење е да не замижуваат, туку да го пријават тоа на своето раководство.
Рускиот министер за надворешни работи Сергеј Лавров на 23 мај изјави дека Русија ќе ѝ достави на Украина нацрт-„документ за спогодба“ штом ќе заврши размената на затвореници.