Претходните преговори за ставање крај на руската инвазија на Украина се водеа меѓу Вашингтон и Москва, додека Киев беше исклучен од процесот.
Но, тоа може да се промени оваа недела, кога украинските власти треба да се приклучат на мировните преговори со САД – нешто повеќе од една недела по неуспешниот состанок меѓу Доналд Трамп и Володимир Зеленски.
Интересно е што сите разговори досега се водат на исто место – во Саудиска Арабија.
Зошто Саудиска Арабија?
Саудиска Арабија настојува да го зајакне својот глобален имиџ, а посредувањето во таквите преговори е можност дополнително да го зголеми своето дипломатско влијание, пишува Sky News.
Откако неговата репутација беше сериозно нарушена со убиството на новинарот Џамал Кашоги во 2018 година, Ријад инвестираше милијарди во спортски проекти како што се елитните голф и фудбалски лиги и големи боксерски настани – потези кои критичарите ги гледаат како обид да се „спортизира“ слабото досие за човекови права во арапската земја.
На дипломатска сцена, Саудиска Арабија постигна договор со Иран, беше домаќин на Зеленски на самитот на Арапската лига и учествуваше во преговорите за војните во Судан и Газа.
Кралството се обидува да се позиционира како водечка сила на Блискиот Исток и доминантен глас на сунитскиот муслимански свет, според Скај.
Зошто САД и Русија ја избраа Саудиска Арабија?
Трамп во јануари го нарече саудискиот престолонаследник Мохамед бин Салман „фантастичен човек“, додека Ријад планира да инвестира 600 милијарди долари во следните четири години.
Трамп сака таа сума да се зголеми на трилион долари и најави дека ќе побара од Саудиска Арабија да ги намали цените на нафтата.
Од друга страна, Саудиска Арабија одржува блиски односи со Москва преку соработка во нафтената алијанса ОПЕК + и покрај санкциите на Западот против Кремљ.
Ријад веќе одигра улога во посредувањето во војната во Украина – помогна во размената на затвореници во 2022 година, во која беа ослободени 215 Украинци, вклучително и бранителите на Мариупол.
Саудиска Арабија нуди дискреција и контролирани услови
Друга клучна причина за одржување на разговорите во Саудиска Арабија е строгата контрола на информациите и приватноста, пишува Sky News.
Автократската влада во Ријад и послушните медиуми овозможуваат тајни преговори, далеку од јавноста и притисок од европските или западните политички актери.
Со тоа, Саудиска Арабија ја зацврстува својата позиција како неутрална сила способна да води многу чувствителни преговори.