Иран прогласи банкрот на една од најголемите приватни банки во земјата, Ајандех банка, чии средства беа преземени од државата.
Банкротот на банката доаѓа во време кога земјата се соочува со сериозни економски предизвици и меѓународни санкции поради нејзината нуклеарна програма.
Ве потсетуваме дека сеопфатните санкции на Обединетите нации против Иран стапија на сила за прв пат по 10 години.
Санкциите им забрануваат на компаниите, луѓето и организациите да склучуваат какви било договори поврзани со нуклеарните и балистичките ракетни програми на Техеран и се очекува да имаат пошироки последици за иранската економија.
Основана во 2012 година, Ајандех Банк прерасна во една од водечките финансиски институции во Иран, со мрежа од 270 филијали низ целата земја, од кои 150 се во самиот Техеран. Сепак, долгорочните финансиски проблеми доведоа до нејзин колапс.
Според ISNA, акумулираните загуби на банката изнесуваат околу 5,2 милијарди долари, додека долговите надминуваат 2,9 милијарди долари.
Долги редици загрижени клиенти се формираа денес пред поранешните филијали на банката „Ајанде“ во Техеран, а присутна беше и полиција.
Централната банка на Иран одлучи средствата на згасната банка „Ајанде“ да ги преземе државната банка „Мели“, што гарантира дека граѓаните нема да останат без своите заштеди.
„Трансферот од банката Ајандех во банката Мели е завршен“, изјави директорот на банката Мели, Аболфазл Наџарзаде, за државната телевизија.
Иранскиот министер за економија, Али Маданизаде, изјави дека клиентите „немаат причина да се грижат“, додека претставникот на Централната банка, Хамидреза Ганијабади, ги наведе „лошите долгови“ како главна причина за банкрот.
Според него, повеќе од 90 проценти од средствата на Ајандех банката биле наменети за компании и проекти поврзани со банката, која никогаш не ги вратила долговите. Меѓу таквите проекти се издвојува луксузниот трговски центар „Иран Мол“ во Техеран – еден од најголемите трговски комплекси на Блискиот Исток.
Покрај Ајандех банката, неколку други ирански банки во моментов се соочуваат со сериозни тешкотии, според агенцијата Тасним.
Кризата во банкарскиот сектор беше дополнително продлабочена со повторното воведување на строги санкции од Обединетите нации.