Трговската војна меѓу двете најголеми светски економии добива нова димензија. Кина најави дека од 10 април ќе воведе реципрочна царина од 34 отсто на целиот увоз од САД, како одговор на новите американски мерки.
Да потсетиме, американскиот претседател Доналд Трамп во средата претстави пакет царини во вкупна вредност од 54 отсто за целиот кинески увоз, како дел од новата трговска политика симболично наречена „Ден на ослободувањето“.
Кинеското Министерство за трговија остро реагираше на овој потег, оценувајќи го како унилатерален напад кој ги крши правилата на меѓународната трговија.
– САД воведоа таканаречени „реципрочни тарифи“ врз основа на субјективни и еднострани проценки, што сериозно ги загрозува легитимните права и интереси на инволвираните страни. Тоа е класичен пример за еднострано малтретирање. Кина ги повикува САД веднаш да ги прекинат ваквите мерки и да ги решат разликите преку еднаков дијалог – се вели во соопштението објавено во четвртокот наутро по локално време.
Кина е втор најголем извозник во САД, по Мексико, а најновите царински мерки значат сериозно заострување на односите во глобалната трговија.