Финансиската полиција поднесе кривична пријава против поранешниот министер за култура Хисни Исмаили, поради сомневање за неодговорно работење при вршење на службено дејствие.
Од Финансиската полиција велат дека Исмаили во својство на министер постапил неодговорно на 24.07.2020 година со тоа што потпишувал решенија и склучувал договори со правни и физички лица за финансирање проекти во вкупна вредност од 31.824.000 денари, иако бил свесен дека со ребалансот на владиниот буџет од 15 мај истата година недостасуваат финансиски средства за тековните веќе преземени обврски во однос на тендерите годишно за финансирање проекти.
Со ова поранешниот министер, врз основа на потпишаните уредби и склучените договори, нанел штета на буџетот на Министерството за култура во износ од 31.824.000 денари или 517.196 евра.
Исмаили на министерската функција беше една година, а дојде од редовите на политичката партија Беса.