Русија лансираше бараж беспилотни летала во ноќниот напад врз Украина во петокот, при што загинаа најмалку четири лица, а беа ранети 35 во североисточниот град Харков, соопштија регионалните власти.
Во четвртиот ваков напад врз градот оваа недела, руски беспилотни летала погодија станбени области, оштетувајќи неколку високи згради и предизвикаа повеќе пожари.
Спасувачките екипи цела ноќ ги пребаруваа урнатините, барајќи преживеани.
„Од утрово, за жал, веќе има четворица мртви. Телото на уште едно лице кое беше убиено од рускиот агресор е извлечено од урнатините. Имаме и 35 ранети“, изјави градоначалникот Ихор Тереков на апликацијата „Телеграм“.
Канцеларијата на главниот обвинител соопшти дека обвинителите работат на идентификување на убиените. Во соопштението се наведува и дека меѓу повредените во нападите со дронови има и три деца.
Украинските единици за воздушна одбрана и мобилните ловечки групи со беспилотни летала соборија 42 од 78 руски беспилотни летала во текот на ноќта низ Украина, соопштија военото воздухопловство.
Минатата недела Харков беше цел на напади со руски беспилотни летала речиси секоја вечер. Во претходните напади, беа оштетени индустриските постројки и инфраструктурата во градот, соопштија властите.