Соединетите држави се апсолутно во право дека ние европските сојузници во НАТО мора да преземеме поголема одговорност за мирот и стабилноста, изјави денеска министерот за надворешни работи и надворешна трговија Тимчо Муцунски по пристигнувањето на вториот ден од средбата на шефовите на дипломатиите на Алијансата во Брисел.
„Пет проценти можеби нема да се постигнат преку ноќ, но мора да продолжиме со инвестициите во нашите одбранбени индустрии, мора да продолжиме со инвестициите во нашите воени капацитети и ова е вистинската траекторија што сите мораме да ја следиме“, рече Муцунски во врска со вчерашната изјава на американскиот државен секретар Марко Рубио дека членките на НАТО мора да ги зголемат трошоците за одбрана на ниво од пет проценти од својот БДП.
Според Муцунски, не се работи за билатерални односи со САД, туку за инвестиции во безбедноста, бидејќи без неа нема стабилност и без сигурност и соодветни инвестиции во неа, не само во Европа, туку и во Индо-пацифичкиот регион и во другите делови на светот, општествата што ги создадовме нема да опстанат.
„Тоа нема да биде лесно и ќе биде процес кој предизвикува предизвици, но тоа е нешто кон што сите треба да се стремиме“, нагласи Муцунски.
Во однос на Украина, Муцунски истакна дека силно верува оти сегашната американска администрација има правилен пристап, кој има за цел постигнување мир со учество на Киев и сите НАТО сојузници во тој процес.