Висцералната маст се складира длабоко во абдоминалната празнина, околу виталните органи како што се црниот дроб, панкреасот и цревата. Кога станува збор за висцерална маст, не се работи само за изгледот, намалувањето на оваа маснотија е клучно за вашето здравје. Овде важна улога игра исхраната.
За разлика од поткожното масно ткиво, висцералното масно ткиво не е видливо, што го отежнува идентификацијата. Но, иако не можете да го видите, тоа може значително да влијае на вашето здравје. Вишокот висцерална маст е поврзан со поголем ризик од сериозни здравствени проблеми, вклучувајќи срцеви заболувања, дијабетес тип 2 и одредени видови на рак, известува Eating Well.
Одредена храна може да има големо влијание врз управувањето со висцералните маснотии и да го поддржува целокупното здравје. Меѓу нив се издвојува една протеинска храна и јаткасто овошје со специфични придобивки – ф’стаците.
Како ф’стаците помагаат во намалувањето на висцералните маснотии?
Важно е да се напомене дека ниту една храна нема да ги намали висцералните масти сама по себе, особено ако не ја прилагодите исхраната и начинот на живот за да ги постигнете посакуваните резултати. Но, ако преземате чекори за да го намалите овој опасен вид на маснотии, вклучувањето на ф’стаците во вашата исхрана може да ви помогне во тој процес.
Тие се богати со здрави масти
Ф’стаците се меѓу најдобрите намирници за намалување на висцералните масти, делумно благодарение на нивната богата содржина на здрави масти.
Диететичарката Аманда Годман истакнува дека ф’стаците се “добар извор на здрави масти, особено незаситени масни киселини, кои го штитат кардиоваскуларното здравје. Од друга страна, заситените масти се поврзани со зголемен ризик од кардиоваскуларни проблеми и потенцијално акумулирање на дополнителни висцерални масти”.
Мононезаситените и полинезаситените масти од ф’стаците играат важна улога во борбата против акумулацијата на нездрави масти. Како што е соопштено од Eating Well, мононезаситените масти ги подобруваат липидните профили со намалување на нивото на ЛДЛ холестерол додека го зголемуваат нивото на ХДЛ холестеролот, што има позитивно влијание врз здравјето на срцето и одржувањето на здрава телесна тежина.
Тие се богати со протеини
Една порција ф’стаци од 28 грама содржи приближно 6 грама протеини, што ги прави меѓу јаткастите плодови со најголема содржина на протеини. Протеините се важни за губење маснотии бидејќи го зголемуваат трошењето на енергија преку т.н термички ефект на храната, што значи дека телото согорува повеќе калории при варење и метаболизирање на протеините отколку мастите или јаглехидратите.
Дополнително, конзумирањето на храна богата со протеини, како ф’стаците, помага да се зачува мускулната маса за време на слабеењето, осигурувајќи дека телото првенствено ги согорува висцералните масти наместо мускулите.
Тие се полни со антиоксиданси
Антиоксидансите играат важна улога во намалувањето на оксидативниот стрес и воспалението, кои се поврзани со акумулацијата на висцералните масти. Меѓу моќните антиоксиданси содржани во ф’стаците се лутеинот, бета-каротинот и полифенолите. Овие соединенија помагаат во неутрализирање на слободните радикали во телото, намалувајќи го оштетувањето на клетките и поддржувајќи го метаболичкото здравје.
Нискокалорични се
Диететичарот Јохана Кац објаснува дека „ф’стаците можат да го поддржат губењето на маснотиите и метаболичкото здравје благодарение на нивната помала калориска густина (160 калории на порција од 28 грама, додека другите јаткасти плодови имаат од 180 до 200 калории).
Оваа комбинација на висока содржина на протеини и ниска калорична густина ги прави ф’стаците одличен избор за оние кои сакаат да ги намалат висцералните масти додека уживаат во вкусна и удобна закуска. Нивната ниска калорична вредност, заедно со високата содржина на влакна и протеини, може да помогне во регулирањето на апетитот и намалување на внесот на калории во текот на денот.
Како да ги вклучите ф’стаците во вашата исхрана?
Вклучувањето на ф’стаците во вашата исхрана е едноставен и ефикасен начин за поддршка на губењето на висцералните маснотии, а истовремено е и вкусна закуска. Нивната разновидност ги прави лесно да се додадат во различни оброци и закуски:
- Јадете ги ,,на голо”
- Додадете ги во салати
- Додадете ги во смути
- Направете сос
- Додадете ги во десерти.