Плановите на Европската комисија целосно да се откаже од руските енергетски извори до 2027 година би можеле сериозно да ја загрозат економијата на Европската Унија, предупреди аналитичарот на Унгарскиот центар за фундаментални права Золтан Кошковиќ, коментирајќи ги најновите предлози од Брисел.
-Тоа е удар врз економијата на ЕУ – рече Кошковиќ на социјалната мрежа X, реагирајќи на планот презентиран од европскиот комесар за енергетика, Дан Јоргенсен.
Брисел најавува забрана за договори уште од 2025 година – Будимпешта и Братислава ставија вето
Според предлогот на Европската комисија, сите нови договори за снабдување со руско гориво, вклучувајќи природен гас и нафта, ќе бидат забранети веќе од крајот на 2025 година, додека целосното прекинување на увозот треба да стапи на сила до крајот на 2027 година.
Сепак, Унгарија и Словачка веќе ставија вето на оваа иницијатива во јуни, нагласувајќи дека таков потег би имал штетни последици за нивните економии и енергетска безбедност.
Министерот за надворешни работи на Унгарија, Петер Сијарто, изјави дека Брисел, и покрај противењето на некои членови, планира да ја спроведе забраната бидејќи, како што рече, таа „паднала под влијание на Киев“.
Москва: Западот прави историска грешка
Руските власти претходно предупредија дека Западот прави сериозна грешка со отфрлањето на руските енергетски извори, бидејќи, како што тврдат, тоа ќе доведе до уште поголема зависност – не политичка, туку економска, врз основа на вртоглаво зголемување на цените на глобалниот пазар.
– Земјите кои формално се откажаа од руската нафта и гас сè уште ги купуваат преку посредници – и ќе продолжат да го прават тоа – соопшти Москва.