Полска често беше мета на агресивни соседи и стана една од водечките европски безбедносни сили во време кога Франција и Германија се ослабени поради внатрешни политички проблеми. Полска следната година планира да потроши 4,7 отсто од својот БДП за одбрана, што ја прави една од водечките членки на НАТО во трошоците за одбрана.
Владата на Доналд Туск проценува дека стратешкиот воен проект ќе чини најмалку 2,35 милијарди евра. Границите на Полска со Русија, Белорусија и Украина се исто така најисточните надворешни граници на Европската унија и НАТО. Туск рече дека очекува „Источниот штит“ да се прошири со текот на времето за да ги заштити малите балтички држави Естонија, Латвија и Литванија.
Полска ја крева одбраната поради руската закана
– Сè што правиме овде (и ќе го правиме на границата со Белорусија и Украина) има за цел да го одврати и обесхрабри потенцијалниот агресор, поради што ова е навистина инвестиција во мирот. За ова ќе потрошиме милијарди злоти, но токму сега цела Европа со големо задоволство ги следи овие инвестиции и нашите потези и ќе ги поддржи доколку е потребно – рече Туск.
Тој додаде дека сака Полјаците „да се чувствуваат побезбедно долж целата источна граница“. Туск, исто така, рече дека утврдувањата ќе ја вклучуваат границата на Полска со Украина, близок сојузник, но не даде детали.
„Источен штит“: На границата на Полска со Русија се појавуваат бариери и ровови
По должината на границата никнуваат противтенковски бариери познати како „ежови“ кои ќе бидат интегрирани со природни препреки како ровови. Туск истакна дека делови од проектот не се видливи со голо око, но дека и покрај ова, тоа е најголемиот проект од ваков вид во Европа од крајот на Втората светска војна.
Плановите, исто така, вклучуваат изградба на системи за извидување и откривање закани, напредни бази, логистички центри, магацини и распоредување на системи против дронови, објави државната новинска агенција ПАП.
Полска забрзано се вооружува
Само во 2024 година, Варшава издвојува 4,12 проценти од БДП за одбранбениот сектор, значително повеќе од 3,43 проценти што ги троши Естонија и 3,38 проценти што ги троши САД.
Секако, поради големината на економијата, Американците се шампиони во апсолутна сума со 824,3 милијарди долари, додека Полска во апсолутна сума даде околу 35 милијарди долари за одбрана. Лошите историски искуства со СССР, во комбинација со рускиот напад врз соседната земја, беа сосема доволни за Варшава брзо да ја зајакне својата одбрана.
Најголем дел од зголемените трошоци за војската, кои следната година треба да скокнат на 4,7 отсто од БДП, Полска го троши за набавка на нова воена опрема, од сите видови и за сите гранки на армијата.
Од нови борбени авиони, напаѓачки хеликоптери, беспилотни летала, ракетни фрлачи, хаубици, оклопни возила и големо количество тенкови.
Претходно оваа година, полскиот заменик министер за одбрана откри дека Министерството планира да потпише повеќе од 150 договори за набавка на оружје и воена опрема.
Полјаците прво се свртеа кон своите американски сојузници, сметајќи дека има најголем избор и најголема достапност и количина на системи за оружје што им се потребни.