Крис Вонг, јутјубер и вработен во „Ројал Карибиан“, работи на крстосувачки бродови од 2013 година, а во едно од своите видеа откри колкава ќе биде неговата месечна плата во 2025 година и како успева да заштеди пари додека живее и работи на море.
Имено, на својот YouTube канал, тој откри колку заработил во јануари 2025 година. Бидејќи вработените добиваат плата на секои две недели, Крис добил две исплати: првата од 2.890,21 долари и втората од 1.450,09 долари. Вкупно, станува збор за 4.340,30 долари (околу 3.993 евра), што ги изненади многумина од неговите следбеници.
„Како активен член на екипажот на „Ројал Карибиан“, кога првпат ќе се качите и ќе потпишете, ви се отвора банкарска сметка наречена „Sale at Sea Account“. На секои две недели мојата плата се уплаќа на таа американска банкарска сметка и можам да правам што сакам со неа. Можам да ја ставам таа картичка во банкомат и да подигам пари. Можам да ја користам како дебитна картичка за шопинг, ресторани, продавници – каде и да сакам“, објасни Крис.
Крис истакнува дека износот на приходот зависи од видот на бродот и рутата по која плови.
„Зависи од тоа на кој брод сте, тоа во голема мера ќе влијае на тоа колку пари реално можете да заработите – без разлика дали е голем или мал брод, и каде во светот се наоѓа. Нашите бродови на кои членовите на екипажот потенцијално можат да заработат најмногу се оние во САД за време на карипската сезона“, рече тој.
Тој се присети и на својот најпрофитабилен месец додека работеше како асистент, кога успеа да заработи 5.000 долари.
Бидејќи живее на бродот за време на договорот, Крис нема вообичаени трошоци како што се кирија или превоз, што му овозможува дополнителни заштеди.
„Успеав да заштедам многу пари работејќи за оваа компанија. Секако, заработувам и од мојот YouTube канал. Кога ќе ја соберете мојата плата на крстосувачот и приходите од рекламите на YouTube, добивам прилично добра сума пари вкупно годишно“, истакна тој.
Конечно, тој рече дека се надева дека во иднина ќе се врати на бродовите на „Ројал Карибиан“, но како патник.