Украина ја обвини Русија за кршење на „велигденското примирје“ што го објави рускиот претседател Владимир Путин во саботата, без претходно предупредување.
Во ненадеен потег вчера, Путин рече дека им наредил на своите сили „да ги прекинат сите воени активности“ од 18 часот.
Прекинот на огнот прогласен од Путин во саботата истекува на полноќ по московско време (23:00 часот по средноевропско време).
Портпаролот на Кремљ, Дмитриј Песков, во неделата изјави дека Путин нема да го продолжи примирјето надвор од претходно објавената временска рамка, пренесува руската државна новинска агенција ТАСС.
„Путин не издаде никаква наредба за продолжување на велигденскиот прекин на огнот. Прекинот на огнот завршува вечерва, на полноќ од недела кон понеделник по московско време“, изјави Песков за новинарите во Москва.
Украинските лидери рекоа дека иако има забавување на борбите во текот на ноќта, бројот на напади извршени од Русија повторно почна да се зголемува како што одминуваше неделата.
Во меѓувреме, руското Министерство за одбрана ја обвини Украина за прекршување на примирјето.
Најавата на Путин беше дочекана со непосреден скептицизам од Украина, иако Киев се согласи на 30-часовен прекин на огнот.
Се покренаа прашања за мотивите на Путин да повика на краток прекин на непријателствата, кои дојдоа веднаш откако администрацијата на Трамп се закани дека ќе ги напушти мировните напори без јасни знаци на напредок.
Русија претходно го отфрли предлогот на САД за 30-дневен прекин на огнот што го договори Украина.