СДСМ го нарече назначувањето на новата в.д директорка на Националната агенција за европски програми за образование и мобилност, Ана Михајлова – сомнително.
Како што наведуваат од СДСМ, Михајлова е во центарот на скандалот околу злоупотребата на средства поврзани со образовните програми, поточно два милиони евра во 2016 година.
СДСМ ја обвинува владата дека врши притисок врз обвинителството да не постапува по овие сомневања иако истражната институција на ЕУ, ОЛАФ, доставила документирани злоупотреби.
„Јавното обвинителство сè уште не обработило обвинение за овој целосно документиран случај, доставен до Јавното обвинителство во 2023 година и ажуриран во 2024 година. Од информатори во Агенцијата, СДСМ дознава дека Владата врши силен притисок за да се спречи истрагата на Јавното обвинителство. Дали ова се прави затоа што води токму до Ана Михајлова и нејзиното семејство и најблиските пријатели, евалуатори ангажирани од ВМРО-ДПМНЕ? Дали ова е причината што претходниот конкурс за директор беше откажан? Според кои критериуми беше назначена Ана Михајлова и зошто сега?“, изјави Јовица Јанковиќ од СДСМ.
Назначувањето на Михајлова доаѓа неколку месеци откако Петар Богојески беше назначен за раководител на Националната агенција за европски образовни програми.