Авионот со кој српскиот претседател Александар Вучиќ се упати кон Москва за да присуствува на прославата на Денот на победата во моментов е во Баку и не може да го продолжи летот кон Москва бидејќи нема дозвола да го продолжи патувањето поради воените активности меѓу Русија и Украина.
Српските медиуми наведуваат дека сите земји претходно дале дозвола за летот, но дека сега, поради новонастанатата ситуација, не се во можност да ја издадат дозволата.
Моментално се чека одобрение за продолжување на летот.
За потсетување, Вучиќ претходно денес отпатува за Москва каде што ќе присуствува на Парадата на победата на Црвениот плоштад.
Како што е потврдено за „Блиц“, Вучиќ треба да одржи билатерална средба со рускиот претседател Владимир Путин во петок, што беше најавено и од Кремљ, пренесува „Новости“.
Вчера, Латвија и Литванија го забранија прелетувањето на авионот што Вучиќ го користи за патување до Москва, па затоа не е познато кој воздушен коридор треба да го користи за да пристигне во руската престолнина.
На 9 мај, Русија ја одбележува 80-годишнината од победата над фашизмот во Втората светска војна со традиционална парада на Црвениот плоштад, како и низа други настани. Се очекува да присуствуваат повеќе од 20 светски лидери.