Мал авион се урна на аеродромот Саутенд во близина на Лондон, а на интернет се појавија снимки на кои се гледаат последиците од огромниот пожар. Засега нема извештаи за мртви или повредени лица.
Полицијата објави дека во несреќата учествувал авион долг 12 метри, но засега не е наведено колку патници имало во авионот, ниту колку се повредени.
„Соработуваме со сите служби за итни случаи на местото на настанот и оваа работа ќе трае уште неколку часа“, се вели во соопштението на полицијата, пренесува Скај њуз.
Според достапните информации, станува збор за „Бич Б200 Супер Кинг Ер“.
Според услугата за следење на летови „Флајтрадар“, авионот полетал во 15:48 часот и бил на пат кон Лелистад, град во Холандија.
Еден маж, кој бил на аеродромот со сопругата и децата, изјавил за „Скај њуз“ дека авионот се урнал само неколку секунди по полетувањето.
Противпожарната и спасувачка служба на округот Есекс соопшти дека четири екипи, заедно со теренски возила, реагирале на местото на настанот.
Службата за брза помош на Источна Англија соопшти дека на местото на настанот се испратени четири амбулантни возила, четири возила од тимот за одговор во опасни подрачја и едно воздушно амбулантно возило.