Млекото е веројатно најпопуларниот извор на калциум, но ако не сте љубител на млеко, постојат и други начини да добиете калциум, минерал важен за силни коски. Калциумот е од суштинско значење за одржување на густината на коските и спречување на остеопороза, болест која ги прави коските слаби и кршливи. Сепак, покрај млечните производи, калциумот можете да го внесете и преку овошјето богато со овој минерал.
Зошто калциумот е важен за телото?
Нутриционистот Аншул Синг за порталот Health Shots објаснува дека „речиси 99 проценти од калциумот се наоѓа во коските и забите, каде што обезбедува структурна поддршка и сила“. Бидејќи коските постојано се обновуваат, овој минерал помага во одржување на нивната густина и спречува губење на коскената маса. Клучно е и за јачината на забната глеѓ, која штити од киселини и бактерии.
Исто така, калциумот помага во правилното функционирање на мускулите, овозможувајќи им правилно да се контрахираат и да се релаксираат. Исто така, помага при згрутчување на крвта, придонесувајќи за заздравување на раните и спречување на прекумерно крварење.
Какво овошје да се јаде за внес на калциум?
Ако сакате да внесете повеќе калциум во вашата исхрана со јадење овошје, почесто вклучете некои од овие вкусни и здрави опции во вашето мени.
Портокалите
Портокалите не содржат само витамин Ц. Според американското Министерство за земјоделство (USDA), 100 грама портокал содржи 43 mg калциум.
,,Затоа, консумирањето портокали може да го поддржи имунолошкиот систем, здравјето на коските и нормалната мускулна функција“, објаснува нутриционистот.
Смокви
Смоквите не само што се богати со калциум, туку и со калиум, влакна и антиоксиданси.
„Половина шолја смокви содржи околу 180 милиграми калциум, а поради високата содржина на влакна помагаат во подобрување на варењето“, додава нутриционистот во Health Shots.
Високата содржина на калиум во смокви придонесува и за здравјето на срцето.
Киви
Киви, одличен извор на витамин Ц, содржи и калциум.
„Благодарение на високата содржина на витамин Ц, го промовира здравјето на кожата и производството на колаген“, објаснува Синг.
Со приближно 60 милиграми калциум, киви помага и во одржување на здравјето на коските.
Капини
Капините се бобинка која е богата и со калциум. „Половина чаша капини содржи околу 42 милиграми калциум“, вели нутриционистот.
Освен со калциум, капините се богати со витамин Ц, влакна и антиоксиданси, што ги прави одлични за имунолошкиот систем и варењето.
Малини
Друга бобинка што можете да ја јадете за внес на калциум се малините. Нутриционистот истакнува дека „половина шолја малини содржи околу 32 милиграми калциум“. Оваа сакана бобинка исто така е богата со влакна и витамин Ц, а редовното консумирање може да го подобри варењето, да го зајакне имунитетот, како и коските и забите.
Лимон
Лимоните се одличен извор на витамин Ц и влакна, а содржат и калциум. Според USDA, 100 грама лимон содржи 26 милиграми калциум.
,,Бидејќи се богати со витамин Ц, лимоните го зајакнуваат имунолошкиот систем и ја подобруваат апсорпцијата на калциум, што е клучно за здравјето на коските“, заклучува нутриционистот.