Дигестивниот систем игра клучна улога во разградувањето на храната, апсорпцијата на хранливи материи и зајакнувањето на имунитетот. Иако честопати не размислуваме за тоа кога сè функционира правилно, секојдневните навики можат сериозно да го нарушат неговиот баланс. Резултатот може да биде надуеност, запек и општо лошо варење. Диететичарите ги споделија со порталот Health Shots најчестите навики што можат негативно да влијаат на здравјето на цревата и кои треба да се намалат или целосно да се прекинат за нивното здравје.
Целодневни грицки
Постојаното јадење, без соодветни паузи помеѓу оброците, не му дава на вашиот дигестивен систем доволно време да ја процесира храната. Таквото преоптоварување може да предизвика надуеност и дигестивна непријатност бидејќи цревата немаат можност да се одморат и да се опорават.
Премногу кофеин
Прекумерниот внес на кофеин, особено од кафе, може да ја иритира желудочната слузница. Кофеинот, исто така, го стимулира зголеменото лачење на желудочна киселина, што може да доведе до горушица, непријатност и лошо варење.
Недоволен внес на течности
Водата е неопходна за движење на храната низ дигестивниот тракт. Недоволното пиење течности може да доведе до запек и бавно варење. Хидратацијата помага во одржувањето на рамнотежата во цревата и подобрувањето на варењето.
Прекумерно џвакање гума за џвакање
Со џвакањето мастики, голтаме вишок воздух, што го зголемува ризикот од гасови и надуеност. Покрај тоа, многу мастики без шеќер содржат вештачки засладувачи кои можат дополнително да го иритираат желудникот, пишува Health Shots.
Недостаток на пробиотици во исхраната
Пробиотиците се корисни бактерии кои помагаат во одржувањето на рамнотежата на цревната микрофлора. Доколку не внесуваме доволно од нив преку храна или додатоци во исхраната, можат да преовладаат штетни бактерии, што може да доведе до дигестивни нарушувања.
Јадење под стрес
Брзото јадење или јадењето под стрес го отежнува процесот на варење. Телото потоа не е фокусирано на варењето, што може да предизвика непријатност, надуеност и гасови. Свесното и бавно јадење го олеснува празнењето на цревата.
Одложување на одењето во тоалет
Игнорирањето на потребата за дефекација може да доведе до запек. Доколку оваа навика се повторува, може да се наруши природниот ритам на цревата, што дополнително ги влошува проблемите со варењето.
Недостаток на сончева светлина
Сончевата светлина го стимулира производството на витамин Д, кој игра важна улога во здравјето на цревата. Ниските нивоа на витамин Д се поврзани со нерамнотежа во цревната микрофлора и поголем ризик од воспаление.
Пушење
Пушењето негативно влијае на целото тело, вклучувајќи го и дигестивниот систем. Може да предизвика рефлукс на киселина, чиреви и да го наруши балансот на корисните бактерии во цревата.