На англиканскиот свештеник од американската сојузна држава Мичиген му е одземена дозволата за црковна служба бидејќи го имитирал неодамнешниот поздрав на милијардерот Илон Маск на митинг за заштита на животот, што многумина го протолкуваа како нацистички поздрав.
Калвин Робинсон го направи тоа минатата недела на митинг за живот во Вашингтон. На крајот од своето обраќање до собраните активисти против абортусот, Робинсон потоа ги употреби истите зборови и гест како Маск за време на еден од настаните по повод инаугурацијата на Доналд Трамп за претседател на САД.
Исто како Маск, Робинсон им рече на толпата: „Моето срце ти припаѓа тебе“, рече тој, ставајќи ја десната рака на срцето, а потоа нагло ја подигна, со дланката свртена надолу и со прстите споени. Оваа сцена исто така стана вирален клип на социјалните мрежи.
Според многу набљудувачи, гестот на Маск неверојатно потсетува на нацистички поздрав. Ова мислење го дели и Робинсоновата – сега веќе поранешна – Англиканска црква.
„Ја осудуваме нацистичката идеологија и антисемитизмот во сите нејзини форми“, се вели во соопштението на црквата. Тие, исто така, го изразија своето верување дека „оние кои го имитираат нацистичкиот поздрав, дури и како шега или обид да ги испровоцираат своите противници, ги намалуваат ужасите на холокаустот и жртвата на оние кои се бореле против неговите извршители“.
Публиката на Робинсон на митингот за заштита на животот реагираше на неговиот гест со смеа и аплауз, но тој се соочи со остри критики на социјалните мрежи за неговото однесување.
Како одговор, Робинсон инсистирал дека не е нацист. Тој тврдеше дека гестот имал намера да ги исмее „хистеричните либерали кои го нарекоа Илон Маск нацист“. Тој, исто така, инсистираше на тоа дека неговиот гест „не бил шега за Втората светска војна, ниту признавање на членство во Национал-социјалистичката партија“.
„Контекстот е клучен, но понекогаш луѓето го игнорираат контекстот за да ги потврдат своите предрасуди“, додаде Робинсон, нагласувајќи дека „луѓето го гледаат она што сакаат да го видат“. „Ви простувам за вашето незнаење“, им рече тој на своите критичари.
Робинсон служел во парохија во Гранд Рапидс, Мичиген.
Според информациите од неговите социјални мрежи, тој е симпатизер на екстремно десничарски политички партии. Црковни извори додаваат дека Робинсон има „долга историја на провокативни и антисемитски коментари“, по што црквата издаде предупредувања да не се однесува на таков начин.