– Доколку прекинот на огнот меѓу Хамас и Израел се реализира како што е договорено, двете страни ќе имаат пауза во борбите најмалку четири дена, се наведува во анализата на Скај њуз.
Но, додека договорот не се спроведе на терен, војната во Газа ќе продолжи, најверојатно со обновен интензитет.
Во претходните војни меѓу Хамас и Израел – како во 2012 и 2014 година – деновите и часовите што доведоа до краткорочно примирје беа едни од најтешките, при што двете страни максимално го искористија времето останато пред почетокот на прекинот на огнот со жестоки напади кон другата страна.
Кон крајот на војната во 2014 година, Израел ја нападна Газа со воздушни напади и проектили истрелани од бродови позиционирани во близина на брегот. Различните милитантни фракции во Газа истрелаа низа ракети кон Израел. Се чинеше дека двете страни го празнат својот товар со огромна огнена моќ, се наведува во анализата.
Овој пат, израелскиот премиер Бенјамин Нетанјаху вети дека ќе продолжи со војната по паузата во борбите.
Можеби се чини дека прекинот на огнот или паузата во борбите би биле анатема за Хамас, кој ја поттикна оваа последна рунда во конфликтот по неговото дивеење во Израел, и покрај илјадниците Палестинци кои беа фатени во вкрстен оган, пишува Скај њуз.
Но, низ историјата на групата, Хамас беше прагматичен – ја менуваше и својата идеологија и воена стратегија за да одговари на реалноста на теренот.
Низ годините Хамас постојано велеше дека никогаш нема да го признае Израел, но неговата влада во Газа претходно повика на прекин на израелската воена окупација на палестинските територии и предложи долгорочно примирје. Но сета реторика беше поништена со прекуграничен напад на 7 октомври.
Дури и привремено примирје ќе му даде време на военото крило на Хамас да се прегрупира и да се подготви за следната фаза од војната, се оценува во анализата на Скај њуз.