Апелациониот суд во Штип соопшти дека е завршена постапката по жалбите поднесени против одлуките за притвор во врска со случајот со пожарот во дискотеката „Пулс“ во Кочани. Од вкупно осум случаи, во седум случаи жалбите беа одбиени како неосновани, додека одлуките на Основниот суд во Кочани беа потврдени.
Само во еден случај беше усвоена жалбата на обвинетиот Е.М., при што првостепеното решение за притвор беше поништено и заменето со мерка куќен притвор, заедно со дополнителни мерки на претпазливост.
„Останатите жалби – поднесени од К.Б., Н.И., Р.Ч.Д., М.С., Б.Х., М.Г. и Р.Д. – се отфрлаат, додека мерките притвор или куќен притвор остануваат на сила“, соопшти Апелациониот суд.
Апелациониот суд во Штип вчера објави дека постапува по 17 жалби против изречените мерки „притвор“, „куќен притвор“ и мерки на претпазливост поднесени од лица вклучени во истрагата за случајот со пожарот. Три жалби беа примени во петокот, а 14 жалби вчера.
Во истрагата за трагичниот пожар во дискотеката „Пулс“ во Кочани, кој се случи на 16 март 2025 година, а во кој загинаа 62 лица, осомничени се 68 физички и три правни лица.