Арапските министри за надворешни работи имаат намера да отпатуваат во Вашингтон „во рок од неколку недели“ за да му претстават „цврст“ предлог на американскиот претседател Доналд Трамп за обнова на Газа без раселување на палестинското население, изјавија јордански официјални извори за Си-Ен-Ен.
Претходно овој месец, американскиот претседател предложи протерување на 2,1 милион Палестинци од Газа и претворање на енклавата во „ривиера“ во сопственост на Соединетите држави, план што предизвика бес низ Блискиот Исток и цврсто отфрлање од регионалните лидери.
Арапските лидери се очекува да се соберат на поширокиот самит во Каиро на 4-ти март каде се очекува да биде објавена „патната карта“ за Газа и конфликтот. Се очекува арапските врвни дипломати да отпатуваат во главниот град на САД во наредните недели за да го поднесат предлогот до администрацијата на Трамп, велат изворите.
Арапските власти сакаат да бидат сигурни дека тоа е „цврст план“ пред да му го претстават на Трамп, рече еден од изворите.
Покрај образложувањето на планот за обнова на разурнатиот појас без раселување на населението, арапскиот контрапредлог ќе ги опфати и клучните прашања како што се повоеното управување со Газа, реформите на палестинската управа и распоредувањето на мировните сили или силите што го наметнуваат мирот во појасот, велат изворите.
Не е јасно од кого би се состоеле мировните сили.
Минатата недела, арапските лидери одржаа ретка „неформална“ средба во саудиската престолнина Ријад за да разговараат за планот, собир за кој изворите велат дека е „значаен“ и каде што има „унифицирана позиција“.
Јордан и Египет, две земји за кои Трамп рече дека се кандидати за прифаќање на Палестинците, отфрлаат какво било раселување и сметаат дека тоа е прашање на национална безбедност.
„Нашиот став е цврст и јасен и нема да прифатиме никаква закана за нашата национална безбедност“, рече еден функционер, опишувајќи го како „црвена линија“ за Јордан.
Со месеци властите во Јордан предупредуваа на обиди за раселување на Палестинците во земјата. Јорданскиот министер за надворешни работи во септември минатата година по израелската ескалација на Западниот Брег рече дека секој обид за преселување на Палестинците таму во Јордан ќе се смета за „објавување војна“.
Јорданските власти се загрижени и поради експлозијата на насилство на Западниот Брег и Ерусалим за време на светиот месец Рамазан, кој се очекува да започне во петок или сабота.
Египетскиот премиер Мостафа Мадбули минатата недела тврдеше дека неговата земја може целосно да ја обнови Газа за три години во држава што е „подобра отколку што беше порано“, без да каже како планира да го постигне тоа. Доколку се постигне траен прекин на огнот во Газа во наредните месеци, тоа би значело дека визијата би можела да биде завршена пред крајот на претседателствувањето на Трамп.
Светската банка, Европската унија и Обединетите нации во заедничка изјава минатата недела соопштија дека проценуваат дека само обновувањето на основните услуги, вклучително и здравството и образованието, како и расчистувањето на урнатините, ќе трае три години. Целосната обнова на уништената енклава би траела 10 години и би чинела повеќе од 50 милијарди долари, а само домувањето се проценува дека чини 15 милијарди долари. Египетскиот премиер рече дека планот на неговата земја ги зема предвид тие проценки.