Градоначалничката на Скопје, Данела Арсовска, остро реагираше на изјавата на премиерот Христијан Мицкоски, кој претходно изјави дека „има вистина“ во тврдењата дека таа се користи како инструмент од ДУИ за дестабилизација пред локалните избори.
Во својата објава на социјалните мрежи, Арсовска го нарече Мицкоски „мачe“ наместо „лав“, обвинувајќи го дека не презема ништо против функционерите на ДУИ, Висар Ганиу и Изет Меџити, и покрај, како што тврди, постоењето на документирани докази за 150 дивоградби.
„Лавот Мицкоски не смее да писне против Ганиу и Меџити. Не смее на криво да ги погледне, не пак да бара одговорност за криминал. Лав? Маче“, напиша Арсовска.
Таа исто така го обвини Мицкоски дека ја користи својата позиција за да ја девалвира и да ги заштити криминалните активности на коалицијата ВЛЕН, вклучувајќи ги Меџити и Ганиу.
„Што и да направиш, сите ќе знаат дека е од тебе и дека е во функција на заштита на криминалот на ВЛЕН, Изет Меџити и Висар Ганиу“, додаде таа.
Арсовска исто така го критикуваше Министерството за внатрешни работи (МВР), тврдејќи дека не реагира на нејзините пријави за криминал и дека дури и ја игнорираат кога се јавува на бројот 192.
„Мицкоски, кога мафташе со наводниот фалсификат за ‘Пулс’, за 15 минути постапи МВР. Две недели презентирам документи за флагрантен криминал, а полицијата не смее да прими пријава од мене. Ми спуштаат на 192 кога ќе се претставам кој се јавува. Срам сте вие, не гордост“, напиша таа.
Оваа јавна расправија доаѓа во период на зголемени политички тензии пред претстојните локални избори, со обвинувања за дестабилизација и политички манипулации од двете страни.