– Американскиот претседател Џо Бајден повтори дека останува во претседателската трка и вети дека ќе го победи поранешниот претседател Доналд Трамп одговарајќи на континуираните сомнежи за неговите изгледи и способноста за функцијата по лошиот настап на минатонеделната дебата.
„Оттогаш (дебатата), има многу шпекулации. Што ќе прави Џо? Дали ќе остане во трката? Што ќе правиш?“ рече Бајден за време на кампањата во американската сојузна држава Висконсин.
„Еве го мојот одговор. Останувам и повторно ќе победам“, им рече тој на своите поддржувачи.
Тој рече дека „некои луѓе“ се обидуваат да го истуркаат од трката и порача: „Да го кажам и ова, како што можам, останувам во трката“.
Американскиот претседател го нарече Трамп „најголемиот лажго“.
„Да се фокусираме на она што е навистина важно, да се спротивставиме на најголемиот лажго и најголемата закана. Навистина, најголемата закана за нашата демократија во американската историја“, додаде тој, осврнувајќи се на темата дека додека тој бил малку бавен во дебатата, Трамп успеал да наведе низа невистини.
Бајден се соочува со зголемен притисок за напуштање на трката по неговиот лош перформанс на дебатата против Трамп.
Одредени демократи веруваат дека кандидатурата на Бајден ќе ги загрози шансите на партијата на ноемвриските избори и ќе го направи поверојатно враќањето на Трамп во Белата куќа. Вознемирени од таа можност, тие го повикуваат Бајден да се повлече во корист на некој помлад.