Членовите на групата Вагнер сè уште регрутираат луѓе за да се борат во Украина и покрај тоа што Владимир Путин ги прогласи за „предавници“ по нивниот бунт од минатата недела, пишува Newsweek.
Да потсетиме, група платеници на Вагнер, предводени од Евгениј Пригожин, во саботата минатата недела започна „марш“ кон Москва откако ја превзедоа контролата врз седиштето на јужната воена команда на Русија.
Евгениј Пригожин бараше смена на руското воено раководство, но се откажа од бунтот откако со договор беше испратен во Белорусија. На почетокот на бунтот, центрите за регрутирање на Вагнер почнаа да се затвораат во руските градови, билбордите беа симнати, а групата беше блокирана од руските он-лајн социјални мрежи и социјалната мрежа VKontakte.
Сепак, руската државна медиумска агенција ТАСС пренесува дека регрутирањето на платеници продолжило во центрите на Вагнер во градовите Тјумен и Новосибирск.
Мет Димик, поранешен директор на Советот за национална безбедност на САД за Русија и Источна Европа, изјави за Newsweek дека она што го прави Вагнер сега зависи од видот на ограничувањата на нивното движење и колку цврсто е обвиткан поводникот околу нивниот врат.
Новинар од независниот руски медиум Sirena објави видео на кое се обидува да му се придружи на Вагнер. Во него, Дмитриј Низовцев, претставувајќи се себеси како потенцијален регрут, тврди дека сака да аплицира во групата Вагнер. Му било кажано да ги испрати своите лични податоци преку апликацијата за размена на пораки – WhatsApp и тие ќе му испратат дополнителни информации.
Откако бил информиран дека патните трошоци ќе му бидат вратени, Дмитриј Низовцев прашува за коментарите на Владимир Путин дека Вагнер се „илегалци“ и „предавници“.
„Да бевме предавници, немаше да бидеме во Русија“, бил одговорот што го добил. Во видеото, новинарот прашува и дали регрутите ќе мора да одат во Белорусија, каде што Евгениј Пригожин е прогонет и каде наводно се градат кампови за членовите на Вагнер.
Му било кажано дека информациите во медиумите за Вагнер „може да бидат погрешни“ и дека нивната база е во градот Молкино во областа Краснодар.
Друг независен руски весник, Agentsvo, објави дека на еден од нивните новинари заминал да сними интервју со членови на Вагнер во Мурманск, Смоленск и Ростов на Дон.
Министерот за надворешни работи на Русија, Сергеј Лавров, потврди дека Вагнер ќе продолжи да дејствува во Африка, а бројни официјални лица и експерти признаваат дека групата ќе продолжи да игра клучна улога во остварувањето на надворешнополитичките цели на Кремљ.
„Тие нема да добијат финансирање како порано, освен ако тоа не е за некои многу специфични цели, па мора да најдат некои извори на приходи“, вели првиот човек на руската дипломатија и додава: „Ако руската Влада не им плати, веројатно ќе мора да одат на друго место“.
Постојат спротивставени извештаи за моменталната локација на Евгениј Пригожин. Претседателот на Белорусија, Александар Лукашенко, кој наводно посредувал во договорот за прекин на бунтот, во средата изјави дека првиот човек на Вагнер пристигнал во Белорусија.
Но, податоците на Flightradar објавени на социјалните мрежи покажуваат дека два негови авиони летале од Минск до Санкт Петербург, каде локалниот весник Fontanka објави дека некој што личи на основачот на Вагнер бил забележан во канцелариите на Вагнер во градот.
Бунтот на Евгениј Пригожин и бројните шпекулации поврзани со него сè уште се тема број еден во Русија. Многу луѓе се прашуваат како оваа операција можеше да биде изведена без знаење на највисоките луѓе во Армијата.
Поранешниот британски разузнавач Филип Инграм смета дека првиот човек на Вагнер најверојатно имал помош од луѓе од јужниот воен штаб во Ростов на Дон.
„Неговиот пристап кон патниот транспорт со интегрирана противвоздушна одбрана беше добро испланиран и не постои начин да се концентрира таква сила без луѓето да знаат“, изјавил тој за Newsweek.
Од друга страна, портпаролот на Кремљ, Дмитриј Песков, изјави дека – „нема ништо да додаде“ на прашањето за извештајот за апсењето на поранешниот врховен командант во Украина, генерал Сергеј Суровикин, за кој се знае дека имал блиски врски со Евгениј Пригожин.
„Многу е веројатно дека генералот Сегеј Суровикин бил некако вклучен“, тврди Филип Инграм и објаснува: „Тој нема да биде последниот што ќе биде испрашуван бидејќи Владимир Путин, преку министерот за одбрана Сергеј Шојгу, се обидува да се ослободи од сите дисиденти, земајќи го ова како можност за поширока чистка на неконформистичките воени команданти“, заклучува тој.