Британски авиони ќе летаат над Израел и Појасот Газа во обид да обезбедат информации како дел од напорите за ослободување на заложниците, објави Министерството за одбрана на Велика Британија.
„Извидувачките авиони нема да бидат вооружени, немаат борбена улога и единствена задача ќе им биде да ги лоцираат заложниците“, се наведува во соопштението на Министерството за одбрана на Велика Британија, кое денеска го пренесоа израелските медиуми.
„Само информациите поврзани со заложниците ќе бидат доставени до надлежните органи одговорни за спасувањето на заложниците“, се додава во соопштението.
Министерството за одбрана на Велика Британија истакна дека британската Влада соработува со партнерите од целиот регион за да обезбеди ослободување на заложниците, вклучително и британските граѓани кои беа киднапирани во нападите на палестинскиот Хамас на 7. октомври.
Околу 240 заложници беа земени од јужен Израел, вклучувајќи бебиња, деца, постари лица, оние со двојно државјанство и странци.
Министерот за одбрана на Израел, Јоав Галант, синоќа изјави дека се ослободени 110 заложници, најмногу за време на еднонеделното примирје што заврши во петокот.
За еден израелски заложник, од израелските затвори беа ослободени три палестински жени и мажи.
Тој верува дека во Појасот Газа има уште 125 израелски заложници, јавуваат израелските медиуми.