Претседателот на Белорусија, Александар Лукашенко, денес во Санкт Петербург се сретна со претседателот на Русија, Владимир Путин, кому му соопштил дека руските платеници од групата Вагнер, кои беа префрлени во Белорусија по бунтот против Кремљ, го молат да ги пушти во напад на Полска.
Ова го објави белоруската државна медиумска агенција BELTA, која наведува дека Александар Лукашенко на почетокот на своето обраќање рекол дека – „можеби не треба да го каже ова, но ќе го каже“.
„Припадниците на приватната воена група Вагнер инсистираат да одат на Запад. Тие бараат да одат на запад: ‘Ве молам дозволете ни да го направиме тоа!’, а јас им велам: ‘Зошто сакате да одите на Запад ?’… На крајот на краиштата, ние ги контролираме настаните. Тие сакаат да ја нападнат Варшава и Жешов“,– ги пренесе Александар Лукашенко наводните желби на Вагнер на Владимир Путин.
Тој вели дека градот Жешов на југоисточниот дел на Полска им замерува на руските платеници.
„Кога се бореа во Артјомовска (руското име за украинскиот град Бахмут), знаеја од каде доаѓа тешкото оружје. Тие им замерија. Се разбира, ги чувам во централниот дел на Белорусија, како што е договорено. Од таму не би сакал да ги прераспределувам. Затоа што се лути“, рекол Александар Лукашенко.
ТАСС пренесува дека за време на средбата Владимир Путин му рекол на Александар Лукашенко дека украинската контраофанзива пропаднала.
„Нема повеќе украинска контраофанзива“, изјавил прво Александар Лукашенко при разговорот со првиот човек на Кремљ.
Руската медиумска агенција ТАСС наведува дека Владимир Путин дополнително го појаснил ова.
„Постои, но не успеа“, рекол претседателот на Русија.