На социјалните мрежи се шират фотографии и видеа на кои се гледаат последиците од големото невреме кое вчера го зафати полуостровот Крим.
Украинските власти објавија дека руските крајбрежни одбранбени линии се уништени.
„Крим го зафати силно невреме“, објавија вчера медиумските агенции од Украина на социјалната мрежа Х (Твитер).
Објавите беа надополнети со видеа на кои се гледаат бранови и поплави низ Крим, а истите снимки можете да ги погледнете ОВДЕ.
„Урагански ветрови со брзина до 40 метри во секунда уништуваат дрвја и покриви. Многу области на Евпаторија се поплавени, а јавниот превоз е запрен во Севастопол. Невремето стигна до Русија: најсилните ветрови беснеат во Анапа и Краснодар“, се вели во медиумските извештаји.
Антон Герашченко, советник на министерот за внатрешни работи на Украина, ја сподели веста за невремето од локалните медиуми, тврдејќи дека невремето ја однело руската одбрана ископана на плажите на полуостровот.
„Невремето ги однесе рововите на окупираниот Крим кои руската Армија ги ископа на плажите. Според информациите на кримските медиуми, во Евпаторија водата ја однела одбранбената линија на брегот“, тврди Антон Герашченко.
Во друга објава, авторот и воен аналитичар Хи Сатон сподели фотографија од еден од исечоците објавени од Антон Герашченко.
Тоа покажува руска крајбрежна одбранбена линија која е погодена од бранови, со фотографија на една од линиите во изградба за споредба, а тоа можете да го погледнете ОВДЕ.
„Како почна. Како оди. Руската одбрана на плажите на Крим беше силно погодена од невремето“, напиша Хи Сатон.