Долгоочекуваниот извештај на НАСА за НЛО, насловен како „Независно проучување на неидентификувани аномални феномени“, беше објавен денес, проследен со брифинг во живо.
НАСА минатата година објави дека ги разгледува доказите за т.н неидентификувани воздушни феномени кои го замениле претходниот термин НЛО во официјалната терминологија.
Во извештајот се нагласува дека нема причина да се заклучи дека постојните забележани НЛО се од вонземско потекло. Но, сепак извештајот препорачува таквите тврдења да не се отпишуваат, наведувајќи дека галаксијата не застанува на периферијата на Сончевиот систем.
„Како што го истражуваме непознатото во нашиот сопствен Млечен Пат, така треба сериозно да ја сфатиме можноста за непозната технологија која би можела да потекнува од други делови на галаксијата“, се наведува во извештајот.
„Многу од научните мисии на НАСА се, барем делумно, насочени кон одговор на прашањето дали постои живот надвор од Земјата“, се нагласува во извештајот.
„Тие истраги вклучуваат мисии кои бараат знаци на живот, можеби на Марс или ледените месечини кои орбитираат околу Јупитер и Сатурн, како и во односот помеѓу молекулите присутни во атмосферата на егзопланетите. Потрагата по знаци на вонземска технологија е природно продолжение на тие истражувања. Ако ја дадеме веродостојноста на кое било од овие, тогаш треба да признаеме дека сите тие се барем веродостојни“, се објаснува во извештајот што беше денес објавен во јавноста.
Темата долго време ја фасцинираше јавноста, но беше избегнувана од мејнстрим науката. Независен тим од 16 истражувачи ги споделија своите прелиминарни набљудувања во мај и открија дека постојните податоци и извештаи на очевидци не се доволни за да се извлечат цврсти заклучоци, истовремено повикувајќи на посистематско собирање на висококвалитетни податоци.