Опозицијата во Србија предизвика хаос во Народното собрание со прекинување на седницата, за која претходно најавија дека ќе го блокираат парламентот затоа што Владата молчи веќе четири месеци за барањата што демонстрантите ги поставуваа на протестите по големите масакри што се случија во оваа земја.
За време на обраќањето на премиерката Ана Брнабиќ, пратениците од опозицијата го прекинаа говорот со скандирање, пеење и свирежи.
Пратеникот Небојша Зеленовиќ од пратеничкиот клуб Морамо – Зајдено претходно најави дека ќе ја блокира работата на собранието откако ќе бидат поставени пратеничките прашања.
„Секојдневно околу нас има насилство. Се понудивме да разговараме во парламентот, купивте време, дури ни Анкетната комисија не се оствари. Ние побаравме разговор, а вие понудивте контра средба“, рекол Небојша Зеленовиќ на седницата.
Тој додал дека оваа борба нема да биде лесна бидејќи власта почива на насилство и дека обединетите граѓани и опозицијата можат да се борат за медиумите да бидат подобри, сите да бидат побезбедни и работите да почнат да се менуваат.
Претседателот на Движењето на слободни граѓани, Павле Грбовиќ, на социјалната мрежа Х (Твитер) напиша дека во собраниската сала има 18 лица од обезбедувањето.
Владејачката партија неколкупати со аплауз го поздрави говорот на Ана Брнабиќ, која зборуваше за просперитетот на Србија и ја обвини опозицијата дека ја уништува Србија додека се на власт.
Поради вревата и огорченоста на претставниците, Ана Брнабиќ на своето обраќање извика до опозицијата:
„Можете да правите што сакате, ние никогаш нема да се откажеме“, нагласила таа додека низ салата одекнувале сирени, свирежи, тапани.
„Ајде погласно, ќе се бориме посилно затоа што ако победите, нема да има ни плати, ни пензии, ни патишта… И се ќе биде како што беше кога бевте вие на власт, тоа никогаш нема да го дозволиме. Ќе се бориме секоја минута, секој час, секој ден за подобра и поуспешна Србија“, заклучила Ана Брнабиќ.