Новите царини што американскиот претседател Доналд Трамп ги воведе на многу земји, вклучително и Кина, ќе донесат неверојатни давачки од 54 отсто за кинеските стоки што влегуваат во САД, бидејќи дополнителни 34 отсто сега се додадени на претходно објавените 20 отсто.
Би-Би-Си наведува дека тоа без сомнение ќе им наштети на кинеските компании кои се обидуваат да продаваат стоки во Америка.
Утрово кинеското Министерство за трговија побара од САД „веднаш да ги повлечат овие еднострано воведени царински мерки и да ги решат трговските спорови на адекватен начин преку дијалог со партнерите“.
– Кина силно се спротивставува на овој потег и ќе преземе решителни контрамерки за да ги заштити своите права и интереси – изјави портпаролот на кинеското Министерство.
Кинеската државна новинска агенција Ксинхуа објави коментар за царините на Трамп, велејќи дека тие претставуваат „самоуништувачко вознемирување“ и дека американскиот претседател „ја претвора трговијата во едноставна игра око за око“.
Стивен Мекдонел, дописник на британскиот медиумски сервис од Пекинг, сепак смета дека овие потези на Америка се всушност подарок на Трамп за кинескиот претседател Си Џинпинг.
Тој наведува дека Си ја претставува Кина како шампион на слободната трговија и земја која ги поддржува меѓународните институции и го споредува однесувањето на Пекинг со Америка, која се смета дека ги уништува и двете.
Се потсетува дека минатата недела кинескиот претседател одржа состанок со шефовите на големи меѓународни корпорации, меѓу кои и многу со седиште во Европа.
Пораката од таа средба беше јасна, а тоа е дека САД под Трамп е синоним за хаос, уништување на трговијата и промоција на исклучиво национални интереси, а од друга страна, Кина под власта на Си е гарант за стабилноста, слободната трговија и глобалната соработка.
Репортерот на Би-Би-Си од кинеската престолнина вели дека луѓето може да се поделат кога станува збор за односот на кинеската комунистичка партија кон светот, но посочува дека секогаш кога Трамп донесува мерки како овие најнови царини, на Си му олеснува да ја испрати сликата за себе на светот што го сака.
Заклучено е дека економските потреби сега би можеле многу земји да доближат до Кина и да ја оддалечат Америка на Трамп.