Од Скопје до повеќе европски дестинации ќе се лета по цена од969 до 2.500 денари
Како што најави вицепремиерот Александар Николоски, од ноември ќе има летови до Мадрид и Стокхолм, аод декември до Прага, Бари и Келн.
Унгарската авиокомпанија „Визер“ ја најави новата директна маршрута што ќе ги поврзе Скопје и Келн, првиот лет ќе биде на 15 декември, а картите се од 2.599 денари. Авиокомпанијата нуди вкупно 34 дестинации во 15 земји, заминувајќи од Меѓународниот аеродром „Скопје“ и од аеродромот во Охрид. Компанијата најави дека со зголемувањето на поврзаноста и на достапноста на авионскиот транспорт, ќе се придонесе и за развојот на туризмот и на економијата на земјава
„Утрово потпишавме договор за пет нови дестинации кои ќе се оперираат од скопскиот аеродром. Овие нови авиолетови ќе значат повеќе туристи, повеќе бизнис можности и повеќе избор за сите граѓани на Македонија. Веќе од ноември почнуваат редовните линии Стокхолм – Скопје и Мадрид – Скопје, а од декември и Бари – Скопје, Келн – Скопје и Прага – Скопје“, информираше пред неколку денови Николоски.
Според објавените информации, првите летови и цени по правец се следните:
- Скопје – Мадрид: прв лет на 28 октомври, од 1.949 денари
- Скопје – Стокхолм: прв лет на 27 октомври, од 2.079 денари
- Скопје – Бари: прв лет на 27 октомври, од 969 денари
- Скопје – Прага: прв лет на 15 декември, од 1.619 денари
- Скопје – Келн: прв лет на 15 декември, од 2.599 денари
Вицепремиерот Николоски вчера преку социјалните мрежи објави дека започна продажбата на билети за новата линија Скопје – Келн, нагласувајќи дека оваа авиолинија ќе има големо значење за развојот на туризмот, поврзаноста со дијаспората и за економијата.