Актерот Вин Дизел неодамна ги изненади обожавателите на фестивалот „Фиул Фест“ во Помона, Калифорнија, со информации за најновото продолжение од филмската серија „Брзи и бесни“.
На сцената, тој ги откри своите три клучни услови за снимањето на последниот дел од франшизата, насловен како „Брз X Дел 2“, кој е планиран за април 2027 година.
Дизел носеше маица со натпис „Fast X Part 2 Los Angeles Production 2025“ и рече дека побарал филмот да се врати во Лос Анџелес, да се префокусира на културата на автомобили и уличните трки и да се вратат ликовите на Дом и Брајан О’Конер. Тој особено емотивно ја нагласи важноста од враќањето на ликот на Брајан О’Конер, кој го толкуваше покојниот Пол Вокер во серијата.
Пол Вокер трагично почина во 2013 година за време на снимањето на „Furious 7“. По неговата смрт, продукцијата беше привремено прекината додека не се одлучи како да се продолжи приказната за неговиот лик. Во последните сцени од тој филм, Брајан О’Конер се повлекува од акцијата и се посветува на своето семејство, додека за дополнителните сцени беа користени браќата на Пол, кои служеа како двојници, а лицето на Пол беше дигитално додадено.
Досега, ликот на Брајан не се појави во последователните продолженија, иако повремено се споменуваше дека е жив. Најавите на Вин Дизел укажуваат на можноста дека во последниот дел од филмот ќе се користат необјавени сцени или повторно ќе се ангажираат Коди и Кејлеб Вокер, браќата на Пол, со дигитално зголемување.
Овој потег ги возбуди многу фанови, бидејќи го најавува емотивното враќање на еден од најомилените ликови во серијата, како и враќањето кон корените на популарната франшиза.