Неодамнешен случај на човечка инфекција во САД по контакт со заразен цицач го нагласува зголемениот ризик
Светската здравствена организација е загрижена за ширењето на птичјиот грип Х5Н1, кој има „исклучително висока“ стапка на смртност кај луѓето, пишува Гардијан.
Поради епидемијата која започна во 2020 година, беа убиени десет милиони живина. Неодамна, ширењето на вирусот кај неколку видови цицачи, вклучувајќи ги и домашните говеда во САД, го зголеми ризикот од пренесување на луѓето, соопшти СЗО.
„Ние сме многу загрижени за ова“, рече главниот научник на здравствената агенција на ОН, Џереми Фарар.
Минатиот месец беше објавено дека меѓу заразените има и крави и кози, што ги изненади експертите бидејќи се сметаше дека овие животни не се подложни на овој тип на грип. Американските власти овој месец објавија дека едно лице во Тексас се опоравува од птичји грип откако дошло во контакт со говеда. 16 стада во шест држави беа заразени по очигледен контакт со диви птици.
Варијантата A(H5N1) стана „глобална пандемија на зоонозни животни“, рече Фарар.
„Се разбира, ние сме многу загрижени за инфекцијата на патки и кокошки, а потоа се повеќе и повеќе цицачи. Тој вирус сега се развива и ја развива способноста да зарази луѓе, а потоа и критичната способност да премине од човек на човек“, додаде тој.
Засега нема докази дека Х5Н1 се шири меѓу луѓето. Но, во стотиците случаи кога луѓето биле заразени од контакт со животни во изминатите 20 години, „стапката на смртност е исклучително висока“, рече Фарар, бидејќи луѓето немаат природен имунитет на вирусот.
Во 23 земји во светот од 2003 до 2024 година, пријавени се 889 случаи и 463 смртни случаи предизвикани од вирусот Х5Н1. Смртноста, со оглед на пријавените случаи, е 52 отсто.
Неодамнешен случај на човечка инфекција во САД по контакт со заразен цицач го нагласува зголемениот ризик. Кога вирусот „влегува во популацијата на цицачите, тогаш се приближува до луѓето“, рече Фарар, предупредувајќи дека „овој вирус само бара нови домаќини“.
Фарар додаде дека вирусот бара зголемен мониторинг и дека „многу е важно да се разбере колку човечки инфекции се случуваат бидејќи тоа е местото каде што вирусот ќе се прилагоди“.
„Трагично е да се каже ова, но ако добијам Х5Н1 и умрам, тоа е крајот на тоа“, рече тој. „Но, ако поминам низ заедницата и го пренесам вирусот на некој друг, тоа го започнува циклусот“.
Тој рече дека во тек се напори за развој на вакцини и лекови за Х5Н1 и ја нагласи потребата регионалните и националните здравствени власти ширум светот да бидат обучени за дијагностицирање на вирусот.
Ако Х5Н1 стигне до луѓето и почне да се шири од човек на човек, потребна е таква подготовка за да се стави светот „во позиција веднаш да реагира“, рече Фарар, повикувајќи на еднаков пристап до вакцини, терапии и дијагностика.