На воената парада во Москва, неговиот згоден син Николај Коља Лукашенко седеше до претседателот на Белорусија Александар Лукашенко .
Високиот, русокос млад човек е најмладиот син на белорускиот претседател, кој во својата татковина е наречен „Принц на Белорусија“.
Постариот Лукашенко наводно се подготвува еден ден да ја преземе власта во земјата, а шпекулациите за ова траат со години и повторно се разгореа откако претседателот неодамна изјави дека „ќе остане на власт уште малку“ бидејќи е потребно време за подготовка на новата генерација.
Белорусите се сигурни дека тој мислел на својот син Коља, кого често го носи на важни настани и состаноци со Путин.
Како што веќе напиша Телеграф , Николај е третиот син на Александар Лукашенко, роден на 31 август 2004 година, истиот ден како и неговиот татко, во вонбрачна врска со белорускиот претседател.
Мајката на детето е сè уште мистерија за белоруската јавност. Но, според некои добро информирани извори, мајката на Николај наводно е Ирина Абелскаја, ендокринолог и поранешна лична лекарка на Александар Лукашенко, но ова никогаш не е официјално потврдено.
Мајката на двете постари деца на Лукашенко – Виктор и Дмитриј – Галина Желнерович, е селска учителка со која Лукашенко се оженил во младоста. И додека постарите браќа на Коља се занимаваат со советување и спорт, тој веќе бил предодреден за улога во политиката во своите млади денови, а веќе како шестгодишник бил прогласен за 43-та највлијателна личност во Белорусија.
Кога имал 11 години, се пишувало дека многу сакал оружје и дека носел позлатен пиштол што му го дал тогашниот руски премиер Дмитриј Медведев.
Но, необичните подароци не завршуваат тука. Ерменскиот милијардер Гарик Царукјан, сопственик на дестилеријата на најпознатиот ерменски коњак, Арарат, му подари на Коља буре од 50 литри кое треба да се отвори на неговата свадба, како и два бели (албино) лава кои биле чувани во зоолошката градина во Минск, пишува Jутарњи .
Иако Александар Лукашенко тврди дека сите приказни за тоа како го подготвува Коља за негов наследник се само измислици на опозицијата, сцени како оваа од Москва се многу значајни.