Украинските и руските вооружени сили водат крајно крвави битки во разурнатиот град Бахмут на истокот од Украина, но проукраинските сили се уште се држат, објави во саботата украинската Армија.
Министерството за одбрана на Русија претходно во саботата соопшти дека борците на платеничката приватна група Вагнер зазеле уште два дела на Бахмут, главната цел на руската офанзива во источна Украина.
„Крвави битки невидени во последните децении се случуваат среде урбана градска област“, изјави Серхи Череваџи, портпарол на воената команда за источна Украина.
„Нашите војници прават се што е можно во крвавите и жестоки борби за да ги уништат борбените способности на непријателот и да го скршат моралот. Секој ден, во секој агол од градот, тоа го прават успешно“, изјавил тој за телевизискиот канал 1+1.
Министерството за одбрана на Русија објави дека единиците на Вагнер зазеле две области на северната и јужната периферија на градот. „Единиците на руската Армија ги поддржаа држејќи ја украинската Армија на страна“, стои во соопштението.
Во редовниот дневен извештај за ситуацијата на бојното поле во Украина, Министерството за одбрана на Велика Британија објави дека украинските сили биле принудени да предадат дел од територијата во Бахмут бидејќи Русија ја продолжила својата офанзива таму, отворајќи интензивен артилериски оган во последните два дена.
Бахмут, кој пред војната имаше 70.000 жители, е главната цел на руската зимска офанзива, која досега постигна слаби резултати и покрај копнените пешадиски борби со интензитет што не е забележан во Европа од Втората светска војна.