Владата на Украина ја информираше Белата куќа дека планира да го отстрани главниот воен командант Валериј Залужни, изјавија во петокот за медиумската агенција Reuters два извори запознаени со ова прашање.
Валериј Залужни претходно се судри со претседателот на Украина, Володимир Зеленски, за воена стратегија и други прашања, откако украинската Армија не успеа да ослободи значителна територија од Русија во минатогодишната контраофанзива.
Извор близок до канцеларијата на Володимир Зеленски вели дека двајцата, исто така, не се согласиле за нова воена мобилизација, при што претседателот се спротивставил на предлогот на Валериј Залужни да повика 500.000 нови војници.
Изворот додава дека процесот за разрешување на Валериј Залужни од позицијата врховен командант на украинските вооружени сили во моментов е во мирување бидејќи официјалните лица размислуваат кој ќе го замени.
Друг упатен извор вели дека Белата куќа не изразила став за планираната смена.
„Би нагласил дека одговорот од Белата куќа беше дека тие ниту ја поддржуваат ниту се противат на нивната суверена одлука“, изјавил анонимен извор за Reuters.
„Белата куќа изрази дека зависи од Украина да донесе сопствени суверени одлуки за нејзиниот персонал“, додал изворот.
The Washington Post најпрвин објави дека Украина ја известила Белата куќа за планот да го замени Валериј Залужни.
„Американските власти и кажале на Украина дека не се против отпуштањето на Валериј Залужни“, изјави извор близок до кабинетот на претседателот на Украина.