Владата на Северна Македонија реагираше на одлуката на американскиот претседател Доналд Трамп, кој воведе царински тарифи за Северна Македонија од 33 отсто. Од Владата велат дека ова била очекувана одлука на американската администрација, која не ја занемарила ниту една земја во светот – дури ни Велика Британија, Канада, Европската унија и стотици други земји.
Велат и дека владини тимови веќе извесно време ги анализирале можните последици и заедно подготвиле план за надминување на состојбите.
Оваа одлука нема да има големо влијание врз нашата економија, но имаме јасен план да се движиме напред. Контактите со американската администрација се веќе воспоставени и ќе продолжат на високо ниво, а Владата ќе работи на изнаоѓање решение и спроведување на планот. Она што е важно да се спомене е дека нема потреба од никаква паника, ниту пак од избрзани реакции и заклучоци. Ова е нешто за што долго време беше предупредувано од оваа администрација, а ниту една земја не е изоставена – дури ни најстарите и најтрадиционалните партнери на Соединетите држави.
Ова е обид за повторно преговарање за светските трговски односи – нешто што беше неопходно и што, иако сега е шок за некого, ќе биде можност за други. Знаеме дека оваа ситуација е можност за многумина кои не сакаат добро Владата да нападне без основа и да се обиде да ни го наруши угледот – дали за лични интереси, за партиски цели или за кукавичлук.