Претседателот на Русија, Владимир Путин, во четвртокот потпиша закон со кој се откажува руската ратификација на Договорот за сеопфатна забрана на нуклеарни тестови, објаснувајќи дека Москва сака да се усогласи со САД.
Русија соопшти дека нема да продолжи со тестирањето доколку САД не го сторат тоа, и дека повлекувањето на ратификацијата не го менува нејзиниот нуклеарен став или начинот на кој споделува информации за своите нуклеарни активности.
Вашингтон го потпиша, но никогаш не го ратификуваше договорот од 1996 година. Владимир Путин кажа дека сака Русија, која го потпиша и ратификува пактот, да го заземе истиот став за договорот како и САД.
Некои западни експерти за контрола на оружјето се загрижени дека Русија можеби се приближува до тестирање за одвраќање среде војната во Украина.
Владимир Путин на 5. октомври изјави дека не е подготвен да каже дали Русија треба да продолжи со нуклеарните тестирања откако некои руски безбедносни експерти и пратеници повикаа на тестирање нуклеарна бомба како предупредување за Запад.
Ваквиот потег може да започне нова ера на нуклеарни тестови од страна на големите сили, стравуваат западните експерти.
Одобрувањето на Владимир Путин на законот за повлекување на ратификацијата беше објавено на веб-страницата на Владата, на која се вели дека одлуката стапила во сила веднаш.
Двата дома на рускиот парламент го одобрија овој потег.
Постсоветска Русија никогаш не извршила нуклеарна проба. СССР последен пат тоа го направи во 1990 година, а САД во 1992 година.