Повеќето луѓе сакаат кратенки кои заштедуваат време, но еден од најчестите може да има негативно влијание врз здравјето на мозокот.
Според експертите, иако мултитаскингот, извршувањето на повеќе задачи одеднаш, изгледа ефикасно, всушност го исцрпува мозокот и ја намалува продуктивноста.
„Мозокот може да прави само една работа во исто време. Кога правиме повеќе задачи, всушност многу брзо се префрламе од една на друга задача, што создава илузија на мултитаскинг“, објаснува невропсихологот д-р Џефри Портној за Парад.
Мултитаскингот не само што е помалку ефикасен, туку може да предизвика повеќе грешки и дополнителен стрес.
Неврологот д-р Мухамед Аршад истакнува: „Префрлувањето помеѓу задачите, иако е потребно помалку од секунда, го зголемува напорот на мозокот и може да го намали продуктивното време за дури 40 проценти“.
Тој додава дека мултитаскингот често води до ментална исцрпеност и послаб квалитет на завршената работа.
Наместо мултитаскинг, експертите препорачуваат да се фокусирате на една задача во исто време.
„Мозокот најдобро функционира кога е фокусиран на една активност во целост“, вели д-р Портној.
Тој предлага да оставиме кратки белешки ако треба да паузираме некоја задача за да ни помогне да се вратиме на работа. Тој советува и воведување кратки паузи во текот на денот, за да се освежите.
„Мозокот продолжува да работи во позадина дури и додека се одмарате“, вели тој.
Добриот сон, хидратацијата и исхраната богата со хранливи материи се исто така клучни за поддршка на мозокот.
„Побарајте помош кога ви е потребна и избегнувајте прекувремена работа за да спречите исцрпеност“, заклучува д-р Аршад.